Баҳром Ҳайдаров: "Бизга натижа чиройли ўйиндан кўра муҳимроқ эди”

"Мухлисларимизни ғалаба билан табриклайман. Аввалги учрашувларда "Хоразм" тўпни жуда яхши назорат қила олишини кўрсатган эди. Жамоада жуда маҳоратли футболчилар йиғилган. Бундай рақибга қарши қийин учрашув бўлиши аниқ эди. Шу сабабли, биз кўпроқ қарши ҳужумларга асосланган ўйин режасини танлаган эдик. Рақиб хатосидан фойдаланиб, гол ура олдик. Рақиб эса ўз вазиятларидан фойдалана олмади. Бугун бизга натижа чиройли ўйиндан кўра муҳимроқ эди", - дея фикр билдирди Баҳром Ҳайдаров бугунги учрашув ҳақида.

- Танаффусда футболчиларга нималар дедингиз? Сабаби жамоангиз иккинчи бўлимни жуда яхши бошлади...

- Биз ҳисобда олдинга чиқиб олганимиздан сўнг, рақибимиз янада кўпроқ куч билан ҳужумга ўта бошлади. Биз эса йигитларга юқорироқ позицияларда рақибни кутиб олишимиз кераклигини айтдим. Айрим бир вазиятларда режаларимиз иш берди, аммо жамоамиз ҳали ёш. Таркибимизда Суперлигада эндигина дебют қилаётган футболчилар бор. Ҳаттоки Шота Суперлигада энди дебют қилди. Бешимов ва Кондратюк каби футболчиларга бироз ишонч етишмаяпти, аммо уларнинг меҳнати мана шундай натижаларга эришяпмиз. 

- Бугун Шота Газава яна майдонга қайтди. Газаванинг бугунги ўйини ҳақида фикр билдириб ўтсангиз...

- Шота бугун жамоага анча фойда келтирди. Таянч ярим ҳимоячи позициясида етишмовчилик бор эди, аммо у ҳали жисмоний жиҳатдан тўлиқ тайёр эмас эди.

- Иккинчи бўлимда Шаҳзод Бешимов бироз ёлғизланиб қолгандек. Унинг ёнига яна бир ҳужумкор футболчини майдонга туширсангиз бўлмасмиди? 

- Биз Егор Кондратюкни захирага олмоқчи эдик. Сабаби, у бироз чарчаб қолди ва ўзи ҳам шуни айтди. Егор бугунги ўйинга бироз тайёр эмас эди. Рақиб ҳаво орқали ўйнашни бошлагани сабабли Жасур Ёқубовни майдонга туширишга мажбур бўлдик. 

- Иқбол Маликжонов учта ўйинга четлатилди. Сизнинг фикрингизча футболчига жуда ҳам қаттиқ жазо қўлланилмадими?

-  Маликжонов Бизнинг футболчимиз бўлгани туфайли енгилроқ жазо кутган эдик, албатта. Бироқ сўнгги иккита четлатишда ўзимизнинг айбимиз бор. Шу сабабли ҳеч қандай эътироз билдира олмайммз. 

- Жамоангиз қизил карточкалар бўйича етакчи бўлиб турибди. Футболчиларга имкон қадар қизил карточкадан қочиш кераклигини айтганмисиз?

- Футболда кичик деталлар ҳам катта роль ўйнайди. Биз ҳар бир эпизодларга тайёргарлик кўрганмиз. Ҳар бир мажлисимизда ушбу ҳақда гаплашганмиз. “Сурхон”га қарши кечган ўйиндан олдинги назарий машғулотда фақатгина карточкалар мавзусини кўтарган эдик. Футболчиларимиз ҳали ёш ва рақиб провокациясига учиши мумкин. Ғофуровдан ташқари қолган барча четлатишлар атайлаб қилинмаган эди.