БАА Спорт вазирлиги "Ҳаммамиз оқлар тарафидамиз" кампаниясини ўтказмоқда: Спорт федерацияларига бепул чипталар тарқатиляпти

Championat.asia сайтига маълум бўлишича, мамлакат Спорт вазирлиги миллий терма жамоани ҳал қилувчи ўйинда қўллаб-қувватлаш мақсадида "Ҳаммамиз оқлар тарафидамиз" шиори остида кампания олиб бормоқда. Вазирлик БААнинг барча спорт федерацияларини тарғибот ишларида фаол қатнашишга чақирди.  

Вазирлик турли спорт турлари миллий терма жамоа сардорларига қисқа видео орқали мурожаат қилиб, жамоатчиликни руҳлантириш ва "оқлар" (БАА терма жамоаси лақаби – таҳр.) ўйинчиларини қўллаб-қувватлашга ундади. Бундан ташқари, "Ал Наҳайён" стадиони трибуналарида ўтириш учун миллий терма жамоалар аъзоларига бепул чипталар ҳам тарқатилмоқда.

Хабарингиз бор, БАА томони турли йўллар билан ўзбекистонлик журналист ва мухлисларга "тўсиқ" қўйишга уринмоқда. Тармоқларда тарқалган хабарларга кўра, ўзбекистонлик мухлисларга барабан ва яна бир қатор воситаларни стадионга олиб киришга рухсат берилмаслиги мумкин.

Бугун ҳар икки терма жамоа вакиллари иштирокида матбуот анжумани ҳамда расмий машғулот жараёнлари бўлиб ўтади. Воқеалар ривожини Championat.asia орқали кузатиб боринг.

Эслатиб ўтамиз, БАА ҳамда Ўзбекистон ўртасидаги ЖЧ 3-саралаш босқичи 9-тур учрашуви эртага Тошкент вақти билан 21:00 да бошланади.