Азизбек Тўлқунбеков: «Ҳозирги Индонезия аввалгисидан кучли ва яхши шаклланган»

— Ўйин ҳақида

— Жуда қизиқарли ўйин бўлиб ўтади. Мураббийларимиз билан биргаликда рақибимизнинг кучли ва кучсиз томонларини ўрганиб чиқдик. Жамоадошларим билан яхши ўйин кўрсатиб, ғалаба қозонишга ҳаракат қиламиз.

— Индонезия билан ўтган йили ҳам ўйнагансизлар. Ўша пайтдаги жамоа билан ҳозиргисининг фарқи нимада?

— Ҳа, улар билан олдин ўртоқлик ўйинида ўйнаганмиз. Ўша пайтда Индонезия сафида ҳам, бизнинг жамоамизда ҳам асосан янги футболчилар бўлганди. Ҳозирги Индонезия аввалгисидан кучли ва яхши шаклланган. Уларда ҳам футбол ривожланган. Бироқ биз ўз ўйинимизни намойиш этиб, ғалаба учун майдонга тушамиз.

— Сиз бундан аввал U-17, ҳозирга келиб U-20 Осиё кубогида иштирок этяпсиз. Бу мусобақаларнинг ўхшашлик ва фарқлари ҳақида нималар дея оласиз?

— Бу иккала мусобақа ҳам ўзига яраша футболчилар учун фойдали, айниқса ўсмирлар ва ёшлар учун. Лекин уларнинг ўртасида фарқ катта, деб ҳисоблайман. Чунки катта ёш тоифасидаги мусобақада даража барибир бошқача, ўйин темпи ва тезлик юқори бўлади. Иккала турнирда ҳам рақиблар кучли, айниқса ёшлар ўртасидаги мусобақада деярли тенг кучли жамоалар иштирок этмоқда.