Азамат Абдураимов: "Шогирдларимда гол уриш иштиёқи юқори бўлди"

Табиийки, 7:1 ҳисобидаги ғалабадан кейин жамоамиз устози Азамат Абдураимовнинг кайфияти чоғ эди. Бош мураббий ўйин тўғрисида қуйидаги фикрларни билдирди.

- Бугун сунъий қопламали майдонда тўп сурганимиз ўйин осон ўтмаслиги маълум эди. Шу боис биринчи бўлимда ўйинимиз унчалик қовушмади. Қолаверса, бугунги баҳсда ёш ва янги ўйинчиларни синаб кўришга қарор қилганим учун айрим етакчиларимизни захирадан қолдиргандим. Аммо иккинчи таймда йигитлар ўз ўйинини намойиш этиб рақиб дарвозасига бир нечта голлар киритишди. Албатта, ўйиндан ва натижадан тўла қониқиш ҳосил қилдим. Биринчи босқичда рақиблар дарвозасига 4тадан ортиқ гол урмагандик. Мени хурсанд қилгани, бугун шогирдларимда иштиёқ юқори бўлди ва ўта йирик ҳисобда ғалаба қозондик. Ўйлайманки, кейинги учрашувда ҳам йигитлар мана шундай сермаҳсулликни давом эттиришади.
Жамоамиз етакчиси Баҳром Абдураҳимовда жароҳат борлиги учун майдонга туша олмади. Албатта унинг йўқлиги билинди. Баҳром ҳозир соғлигини тикламоқда ва тез орада у сафга қайтади.

Сардор Соипов, Акром Комилов ва Даврон Усмонов каби янги футболчилар бугун дебют ўйинини ўтказишди. Дастлабки учрашувда улар ёмон таассурот қолдиришмади. Масалан, Сардорда биринчи таймда гол уриш учун яхши имконият ҳам бўлганди. Лекин вазиятдан унумли фойдалана олмади. Албатта, дебют учрашувдаёқ янги жамоа ўйинини мослашиш осон эмас. Ишонаманки, улар ўйиндан-ўйинга янада яхши тўп суришади ва жамоада ўз ўрнини топа олишади.