Азамат Абдураимов: "Ғалабани осонликча қўлга киритганимиз йўқ"

Мезбонлар ҳимоячиси ўз дарвозасини ишғол этиб қўйиши андижонликларга уч очко келтирди. Ушбу ўйин тўғрисида Азамат Абдураимов қуйидаги фикрларни билдирди.

- Сафарда кичик ҳисобда ғалаба қозонган бўлсак-да, муҳими уч очкони қўлга киритдик ва натижадан албатта қониқиш ҳосил қилдим. Бошқа томондан олиб қараганда, учрашувда йирик ҳисобда ғалаба қозонишимиз ҳам мумкин эди. Лекин жуда қулай вазиятлардан фойдалана олмадик. Алишер Тўхтасинов, Акмал Жўрабоев ва Баҳром Абдураҳимовда гол уришлари учун яхши вазиятлар бўлди. Боз устига мезбонлар автогол қайд этишди. Имкониятларни голга айлантира олмаганимиз албатта хафсаламни пир қилди. Яна шуни айтиш керакки, майдоннинг ҳолати талаб даражасида эмаслиги яхши ўйин кўрсатишимиз имконини бермади. Шу ўринда “Аланга” ҳам ёшлардан иборат яхши жамоа эканлигини айтиб ўтишим керак. Жамоанинг тартибли ўйин кўрсатиши менга ёқди. Умуман олганда ғалабани осонликча қўлга киритганимиз йўқ.

Косондаги ғалабадан кейин Самарқандга келдик ва “Шердор” билан бўладиган ўйинга яхши кайфиятда тайёргарлик кўряпмиз.