Анвар Ғофуров: “Омад туфайли гол урдим”

“Локомотив”га қарши сафар бўлган ўйинда 1 очко билан қайтганимиз учун жамоадошларим “Нефтчи”ни мағлуб эта оламиз деб ўйлаган бўлса керак. Ўша ўйиндан кейин руҳан кўтарилиб кетган эдик. Шунинг учун ҳам “Нефтчи” билан бўлган учрашувда биринчи бўлимда ўйинимиз умуман ўхшамади. Танаффус пайтида жамоадошларим билан гаплашиб ушбу баҳсда ғалаба қозонишимиз кераклигини айтдим. Иккинчи бўлимда бор кучимизни ишга солиб иродали ғалабага эришдик.

Мен бошқа рақиблар ҳақида ўйламайман. Мен фақат ўз ўйинимиз ҳақида қайғураман. Биз барча баҳсларда фақат 3 очкони қўлга киритишимиз керак. Шунда, биздан кейинги ёки олдинги ўринларда бораётган рақиблар натижасига эътибор бериш шарт эмас. “Нефтчи” жамоаси ҳимояда жуда ҳам зич ўйин кўрсатди. Уларнинг ҳимоясини ёриб ўтиш биз учун қийинчилик туғдирди.

Рақиб дарвозасига киритилган иккала голимиз ҳам рақиб жамоа майдончаси ташқаридан киритилди. Қўлга киритилган ушбу ғалабада омаднинг ҳам қандайдир ҳиссаси бор. Лекин, ғалаба 100 фоиз омад эвазига қўлга киритилди дея олмайман. Меҳнатларимиз эвазига рақибни мағлуб этдик. Учрашувда киритилган иккинчи голимиз 100 фоиз омад туфайли бўлди”, - дейди “Обод” ҳимоячиси Анвар Ғофуров.  

Жаҳонгир Сотволдиев