Антонио Конте: "Жозенинг қулоғимга айтган гаплари орамизда қолади"

- "Челси" ижросидаги ўйиндан кўнглим тўлди. Биз учрашувни керакли даражада яхши бошладик. Тўп билан тез ишладик ва голли вазиятлар яратишда фаол ўйнадик.

Жамоам футболчилари бу каби ёрқин футбол ўйнашга лойиқ эдилар. Чунки уларнинг машғулотдаги меҳнатига ўзим гувоҳман. Биз ўз устимизда ишлашдан тўхтамаслигимиз лозим. Чунки янада кучлироқ бўлишни истаймиз.

Ўйнимизни янада кучайтириш ва шакллантириш учун аввало машғулотларда тер тўкмоғимиз лозим бўлади. Бусиз иложи йўқ.

"Арсенал" ва "Ливерпуль"га қарши баҳслардаги муваффақиятсизликлардан сўнг "Манчестер Юнайтед" устидан қозонилган ғалаба муҳим аҳамиятга эга. Бу ғалаба бизнинг мақсадимизни кўрсатиб бериш учун хизмат қилади. Шунингдек бу каби ғалабалар ўз кучимизга бўлган ишончни янада кучайтиради.

"Челси" энди "Вест Хэм" билан бўладиган беллашувга тайёрланмоғи керак.
Давид Луизнинг Феллайнига нисбатан ишлатган қўполлиги? Мен у вазиятни кўрмадим. Шу боис бу ҳақида бир нарса деб фикр билдиришим қийин. Давид Луиз бугун фантастик ўйин кўрсатди.

Мухлислардан жамоани фаолроқ қўллаб-қувватлашларини, ўйин охирида эса олқишлашларини сўрадим. Чунки футболчилар бунга лойиқ ҳаракат қилишди. "Манчестер Юнайтед" ишқибозлари ўз жамоаларини тинимсиз олқишлаб, уларга далда бўлиб туришди. Бизнинг "Манчестер Юнайтед"га қарши баҳсдаги асосий мақсадимиз ўз суюклиларимизга чиройли футбол орқали завқ тақдим этишни истагандик ва табиийки ғалаба билан уларни хурсанд этишни режалаштиргандик. Ўтган мавсум жамоамиз учун муваффақиятсиз ўтганди. Шу боис мухлисларимиз ғалабали онларни жуда соғиниб қолишган.

Жозе Моуриньюнинг гаплари? Унинг қулоғимга айтган гаплари орамизда қолгани маъқул. Чунки мен Жозени ҳурмат қиламан. Моуринью ажойиб мураббий ва унинг гапларини оммага айтмоқчи эмасман.