Андрей Микляев: "Локо" терма жамоага ўхшаб ўйнасинми?"

- Жуда қийин учрашув бўлди. Мени футболчиларга эътирозим йўқ. Биз доим ҳимояланадиган жамоаларга қарши ўйнашга кўникиб қолдик. Бугун ҳам ҳимоя қурғонини ёриб ўтишда қийналдик. Улар жуда чиройли гол уришга муваффақ бўлишди. Абдуллоҳ Олимовнинг голига беш баҳо. Бу гол нафақат турнинг, балки бутун мавсумнинг энг чиройли голи бўлишига асосий даъвогар.

Ҳакам бугун тоза голимизни ҳисобламади. Кахи Махарадзе қўлларини орқага қилиб сакради ва гол урди. Буни қандай қилиб ҳисобламаслик мумкин? Бугунги ҳакамликдан норозимиз. Лекин бу ҳакамлар устидан ПФЛга шикоят ёзмоқчи эмасмиз. Ўйинимиз ҳужумкор эмас? Биз терма жамоага ўхшаб ўйнайликми? Бизга қарши асосан барча жамоалар ҳимоядан ўйнашади. Улар учун бу ердан очко билан қайтиш катта натижа. Масалан "Насаф"га қарши ўйинда очиқ футбол бўлди. Чунки "Насаф" ҳимоядан ўйнамайди.

Блессингнинг ўйинига ҳали баҳо беришга вақтли. Машариповнинг ўйини? Биз ҳам уни ўзига келишини кутяпмиз.