Андижонда бепул чипталар тарқатилиши давом этмоқда

Мухлислар эса ушбу беллашувни интиқлик билан кутмоқдалар.

Халқаро даражадаги терма жамоамиз миқёсидаги учрашувнинг илк бор Андижонда ўтказилиши муносабати билан қизғин ҳозирлик ишлари олиб бориляпти. Эътиборлиси, Ўзбекистон миллий олимпия қўмитаси раиси ва Ўзбекистон футбол ассоциациясининг 1-вице-президенти Умид Аҳмаджонов ҳамда Андижон вилояти ҳокими Шуҳратбек Абдураҳмоновнинг ташаббуси билан мухлисларга Наврўз байрами муносабати билан ҳамда уларнинг маданий ҳордиқ чиқаришларини таъминлаш мақсадида уларга муносиб совға сифатида  стадионга кириш ҳуқуқини берувчи чипталарни бепул қилиб белгиланди. 

Шу боис 21 март куни «Соғлом авлод» стадионида футбол ишқибозларига бепул чипталар тарқатилди. Шунингдек, «Саҳоват уйи», «Меҳрибонлик уйи», кам таъминланган оилалар, вилоятдаги болалар ва ўсмирлар спорт мактаблари ҳамда давлат идора ва ташкилотлари, қолаверса, стадион таъмирланишида беъминнат ҳиссаларини қўшган бир қатор муассаса ходимларига бепул чипталар тақдим этилди. Лекин ҳозирда чипта масаласи билан боғлиқ, яъни чипталарни пулга сотилаётгани ҳақида гап-сўзлар урчий бошлади. Бироқ бундай маълумотларга ишонмаслигингизни сўраб қоламиз. Юқорида таъкидлаб ўтилганидек, учрашувга чиқарилган чипталар бепул тарқатилиши кўзда тутилган. Эртага мухлислар учун чинакам байрам ташкил этиш мақсадида ўйин олдидан элимиз суйган санъаткорлар иштирокида концерт дастури ўтказилиши режалаштирилган.

Ҳурматли футбол ишқибозлари, эртага қизиқарли ва муросасиз кечиши кутилаётган ўртоқлик учрашувига барчангизни таклиф этиб қоламиз.

Шуҳратбек Жўраев