andijon-pfc.uz: Азамат Абдураимов "Андижон"дан кетгани йўқ

Аввало шуни айтиб ўтамизки, бу маълумотлар асоссиз бўлиб “Андижон” жамоасида ҳеч қандай ўзгариш бўлмади. “Локомотив” билан бўлган ўйиндан кейин футболчилар бугун клуб қароргоҳига йиғилишди ва айни пайтда машғулотларни бош мураббий Азамат Абдураимовнинг ўзи ёрдамчилари билан биргаликда ўтказмоқда. Бундан кўриниб турибдики, Абдураимов жамоадан кетгани йўқ.

Тўғри, “Андижон” учун мавсум муваффақиятли бошлангани йўқ. Албатта, кетма-кет мағлубиятлар ҳеч кимга ёқмайди. Лекин Абдураимов ва мураббийлар штаби вазиятни ижобий тарафга ўзгартиришга бор кучлари билан ҳаракат қилишмоқда. Шу боис “Бухоро”га қарши ўйинга жамоа жиддий суръатда тайёргарликка киришди. Тўғри, жамоа мағлубиятга учраса, биринчи навбатда мураббий айбдор саналади. 5-турда “Динамо” жамоаси билан бўлган учрашувдан кейин йиғилиш ўтказилди. Унда Абдураимов бош мураббийнинг ишидан қониқишаётгани ёки қониқиш ҳосил қилишмаётганини футболчилардан очиқ сўраганди. Барча футболчилар бош мураббийга ишонишларини ва ҳаммаси яхши бўлишини айтишган.

Албатта, мухлислар севимли жамоаларидан фақат ғалаба кутишади. Ишонамизки, “Бухоро” билан бўладиган ўйинда “Андижон” футболчилари ишқибозларни хурсанд этишади.