Алишер Никимбаев: "Қатарда 100 фоиз карантин ҳолати эълон қилинмаган"

Маълумки, Алишер Файзуллаевич бугунги кунда Қатар футбол ассоциациясида фаолият олиб боряпти. 

- Қатарда 100 фоиз карантин ҳолати эълон қилинмаган. Ишга эса навбатма-навбат боряпмиз. Масалан, ўзим 1 апрель куни ишга борган бўлсам, энди 14 апрель куни бораман. Худди шу каби ҳар бир ходимнинг иш дастури белгилаб берилган. 

- Ҳозирча Доҳада машиналар қатновига чеклов эълон қилингани йўқ, кўчада машиналар бемалол юрибди. Лекин барибир кўп ҳолларда ҳамма уйда қолишга ҳаракат қиляпти. Ҳафтада икки марта уйдан чиқишимиз мумкин, шунда ҳам озиқ-овқат харид қилгани дўконга борамиз. 

- Лекин шаҳар тўлиқ карантинга ёпилгани йўқ. Ҳатто қурилиш ишлари ҳам давом этяпти. Биласиз, 2022 йилги жаҳон чемпионатига Қатар мезбонлик қилади, шу боис қурилиш тўхтаб қолиши керак эмас. Фақат иш соат бўйича белгилаб берилган, - дейди Алишер Никимбаев. 

Қатар чемпионатида нима гап? Ўйинлар қачондан давом этиши мумкин? 

Бу саволларга Никимбаевнинг жавоби қуйидагича бўлди: 

- Ўйинлар қачондан давом этиши номаълум. Қатар Юлдузлар лигаси тугашига бешта тур қолган. Ёшлар лигаси билан иккинчи дивизионда ҳам бештадан тур қолган. Шунингдек, Кубокда ярим финал ва финал баҳслари ҳали ўтказилгани йўқ. Қатарда расман 14 апрелга қадар барча мусобақалар тўхтатилган. 18 ёшдан кичик футболчилар ўртасидаги турнирлар эса бекор қилинди. 

- Катта эҳтимол билан апрель охирига қадар ўйинлар бўлмайди. Агар апрель охирида жамоалар тўлиқ таркиб билан машғулотларга қайтса, балки май ойи ўрталарида чемпионат ва бошқа мусобақалар тўхтаган жойидан давом эттирилиши мумкин. 

- Шу ўринда 23 май атрофида Ҳайит байрами нишонланишини эътиборга олиш лозим. Бу ҳам режа тузаётганимизда инобатга олинади. Ҳозирги режамиз июнга қадар чемпионатни тугатиб қўйиш ва Кубокнинг ярим финал, финал ўйинларини сентябрга қолдириш. Бу энди вазиятнинг қандай тус олишига боғлиқ.