Александр Крестинин: "Натижадан қониқмадик, аммо сифатли футбол кўрсатдик"

- Ўйин ҳақида

- Натижадан қониқмадик, аммо сифатли футбол кўрсатдик. Вазиятлардан унумли фойдаланишда оқсадик. Биринчи таймда ҳам, иккинчи таймда ҳам кўп вазиятларга эга бўлдик. Яккакурашларда, тўпга эгалик қилишда устун келдик, тўпни кам йўқотдик. Камчилик бўлиб қолган бўлсак-да, ўйинни назорат қилдик. Дарвозамиз олдида хавфли ҳолатлар юзага келмади. Бундай ўйинларда ютқазиш аламли, чунки бутун учрашув давомида устунлик биз томонда эди. Яхши ҳамки, бу расмий ўйин эмас. Умид қиламанки, расмий баҳсларда ҳаммаси яхши бўлади.

- Баҳсда қизил карточкалар кўп бўлди, бу ҳақда қандай фикрдасиз?

- Ҳакамликни муҳокама қилмайман. Футболчимиз ўзини бундай тутмаслиги керак эди. У билан жиддий гаплашиб олдик.

- Валерий Кичин нега ўйинда иштирок этмади? Унинг йўқлиги ўйинга таъсир қилдими?    

 - Албатта, у жамоамиз сардори. Унинг жамоада тутган ўрни катта. Бироқ биз бир ўйинчига қараб қолмаслигимиз лозим. У ўзаро келишувга кўра клубига қайтиб кетди. Аммо агар у жароҳатда ёки дисквалификацияда бўлганда-чи? Биз у билан ҳам, усиз ҳам ўйнашга тайёрмиз. Бу терма жамоа, бу ерга ҳамма кучли футболчилар йиғилган. Ҳамма нарса содир бўлиши мумкин, шу боис доим тайёр туриш керак.