Александр Ежов: "10 киши бўлиб ҳам яхши ўйнадик ва вазиятларга эга бўлдик. Дуранг адолатли натижа бўлди"

"Яхши ўйнадик, аммо ўзимизнинг вазиятларимиздан фойдалана олмадик. Бундай вазиятлардан унумли фойдаланишга мажбур эдик. Машғулотларда ушбу жиҳат устидан ишламоқдамиз. 10 киши бўлиб ҳам яхши ўйнадик ва гол уриш учун имкониятларга ярата олдик. Йигитларга ўйин учун миннатдорчилик билдираман. Дуранг адолатли натижа бўлди", - деди Александр Ежов бугунги учрашув ҳақида.

- Четлатишга қадар жамоа яхши ўйнаб турганди. Қизил карточкадан кейин ҳам жамоа ўйин темпини ушлаб қола олди. Четлатишдан сўнг футболчиларингизга қандайдир алоҳида кўрсатма бердингизми?

- Футболчилар барчасини тушуниб туришибди. Аввалги ўйинларда жуда кўп очколар юқотдик. Ўйиндан ўйинга кучайиб боришимиз керак. Мухлисларимизга ҳам раҳмат, улар бизни қўллаб-қувватлашмоқда. Ўйинимиз ўсиб бормоқда. Мусобақа жадвалида биздан тепароқда бўлган жамоаларга қарши ҳам яхши ўйнамоқдамиз, улардан устунроқмиз. Тўпга эгалик қилиш бўйича. Афсуски, мухлисларимизни ғалабалар билан хурсанд қила олмаяпмиз. Раҳбариятга ҳам раҳмат. Бизни молиявий ва руҳий томонлама ёрдам беришмоқда. Шундай ўйнашда давом этсак, бир кун келиб Суперлига даражасидаги жамоага айланишимизга ишонаман.

- Асосий ҳимоячилардан бири Бобур Акбаров нега майдонга туширилмади?

- Бизда ҳар бир учрашувда юқотиш бор, афсуски. Акбаров сонининг орқа томиридан жароҳат олди. У ҳозир тикланиш жараёнида.