Златко Далич: "Голдан сўнг натижани ушлаб қолиш учун ҳаракат қилдик"

"Жамоамни ғалаба билан табриклайман. Фантастик ўйин ўтказдик. Шу билан биргаликда, "Локомотив"ни ҳам ажойиб ўйин билан табриклайман. Улар ҳам ажойиб ўйнашди. Аммо, бугун менинг жамоам кучли эди. Ўйин учун танлаган тактикамиз бугун ўз ишини берди. Айрим вазиятларда эса омад ҳам бизга кулиб боқди. Голдан сўнг натижани ушлаб қолиш учун ҳаракат қилдик. Барчаси ўзимизга боғлиқ эди ва биз буни уддалай олдик. 

Ўзбекистонда ҳеч қачон ютқазмаганим ҳақида кеча ҳам айтиб ўтгандим. Бу ёқимли анъана давом этаётганлигидан хурсандман", - дейди мураббий.

Ўйиннинг энг яхши футболчиси Умар Абдулраҳмон: "Ал-Айн" аҳлини ушбу ғалаба билан табриклайман. Бугун биз тактик жиҳатдан идеал ўйин намойиш этдик. Керакли вақтда гол киритиб олдик ва ўйин охиригача ушбу ҳисобни ушлаб қолиш қийинчилик туғдиргани йўқ. "Локомотив"га бошқа турнирларда омад тилайман".

Мураббий: Аввалги босқичда ҳам ўз майдонимизда дуранг ўйнаб, сафарда ғалаба қозонгандик. Бу шогирдларим менинг кўрсатмаларимни мукаммал бажараётганликларидан далолат. Биз "Локомотив"дек идеал формада эмасдик. Насиб қилса, албатта ўз формамизга кириб оламиз. Бу биз учун иккинчи ярим финал ва бу ажойиб натижа. 

Умар Абдулраҳмон: Европа топ жамоалари? Мен "Ал-Айн" билан ОЧЛда ғолиб чиқмоқчиман.

Мураббий: Мухлислар томонидан яратилган муҳит бизга ёрдам берди. Бундан хурсандмиз. Тўғри, сизлар хурсанд эмассизлар. Бироқ, айни пайтда биз жуда хурсандмиз.

Биз учун ўз майдонимиздаги дастлабки ўйин қийин бўлганди. Ўшанда иссиқда, шунингдек, босим остида ва мавсумдаги биринчи ўйинимизни ўтказгандик. 

Ўзбекистонда ютқазмаслик сири? Бунда хеч қандай сир йўқ. Ўзбек жамоалари доимо фейр-плейга амал қилишади. Ўйинни бузишга ҳаракат қилмайдилар. Биз учун ўз услубимизда ўйнайдиган жамоага қарши ўйнаш осонроқ", - дея ўз фикрларини якунлади меҳмонлар мураббийи.

Азиз Тўхтамуродов