"Ювентус" Кулусевскини сотиш бўйича музокаралар олиб бормоқда

Таниқли инсайдер Николо Скира тафсилотларни айтиб берди.

Деян Кулусевски ўтган йилнинг январь ойида "Ювентус"ни тарк этганди. Швециялик футболчи ўшанда "Тоттенхэм"га ижарага берилган.

Келишув доирасида лондонликлар 23 ёшли футболчини сотиб олиш имкониятини қўлга киритишди. Италия матбуотига кўра, бу бандни фаоллаштириш 35 миллион еврони ташкил қилади.

Манбанинг таъкидлашича, "шпорлар" раҳбарияти бунчалик кўп пул сарфлашни режалаштирмаяпти. Англияликлар Кулусевскини атиги 20 миллион еврога сотиб олишга тайёр.

Ўз навбатида, туринликлар вингерни 30 миллион евродан камига сотиш ниятида эмас. Яқин орада ҳар икки клуб вакиллари бу борада қўшимча музокаралар олиб боришади.

Кулусевски жорий мавсум "Тоттенхэм" либосида сафида 37 та ўйинда ҳаракат қилиб, 8 та гол урди ва 2 та голли узатмани амалга оширди.