Ёзги трансфер бозорини ларзага келтираётган "Қизилқум"

Сайтимиз манбаларига кўра, "Қизилқум" клуби раҳбарияти селекция ишлари билан машғул. Айни пайтда "Локомотив" қароргоҳини кеча тарк этган Игнатий Нестеров ва Ойбек Қиличев кейинги фаолиятини "Қизилқум" билан боғлаш арафасида.

Кеча хабар берганимиздек, "Қизилқум" АГМКнинг собиқ ҳимоячиси Владислав Касмининдан ташқари "Сурхон"нинг қатор футболчиларига ҳам қизиқиш билдирмоқда.

Хусусан қанот вингери, ҳуқуқий жиҳатдан "Пахтакор"га тегишли бўлган Ҳусниддин Ғофуров, марказий ҳимоячи Дарко Станоевич ва ҳужумчи Александр Касьян "Қизилқум" жамоаси қизиқишлари доирасида. Айни пайтда клуб мазкур футболчилар билан музокараларни давом эттирмоқда.

Менежер Ҳамиджон Актамов қисқа фурсатдаги танаффусдан кейин "Қизилқум" бошқарувига қайтишини катта трансферлар орқали амалга оширишни режалаштирган.

Бундан ташқари ҳам клуб жамоага яна маҳоратли футболчиларни таклиф этишни мўлжаллаган.

Эслатиб ўтамиз, "Қизилқум" жорий мавсум Суперлигада 9-турдан кейин умуман ғалаба қозонмаган ва 2 дуранг эвазига қўлга киритилган 2 очко билан жадвалда 13-ўринни мустаҳкам турибди.