Ёзда эркин агентга айланадиган 19 юлдуз

Transfermarkt нашри ушбу ёзда эркин агентга айланадиган 19 нафар футболчи билан таништириб ўтди.

1. Стефан де Врей, "Лацио"
26 ёш, 35 млн евро

Голландиялик ҳимоячи "Лацио"да ўсди. Сўнгги икки мавсумда клуб уни сотиб юбормади. Бунга қасдма-қасд футболчи ҳам римликлар билан шартнома имзоламади. "Лацио" президенти Клаудио Лотито эса энди Стефан билан шартнома имзолаб бўлмаслигини таъкидлади. Де Врейнинг ўзи мухлислардан кечирим сўраб, шундай деди: "Айрим вақтларда янги мақсадларга эришиш учун жамоани тарк этиш керак". Айни дамда унга "Ливерпуль" ва "Манчестер Сити" каби клублардан қизиқишлар бўлмоқда. Бироқ ҳимоячи Италияда қолишни истайди.

2. Эмре Жан, "Ливерпуль"
24 ёш, 28 млн евро

Юрген Клопп ярим ҳимоячини мақтамоқда: "Эмре шундай ўйнайверса, ундан мамнунман". Бироқ ҳозирча томонлар янги шартнома имзолаш борасида ҳеч қандай ҳаракатларни бошлашгани йўқ. "Агарда келишиб олсак, сизларга буни маълум қиламан - деди Клопп - агарда у кетишни истаса, бунга қаршилик билдирмаймиз". Машҳур футбол агенти Федерико Пасторелло Жан ёзда "Ювентус"га ўтишини таъкидлаган.

3. Марио Балотелли, "Ницца"
27 ёш, 22 млн евро

Янгиликлар иккита, ҳаттоки учта. Биринчидан, Балотелли 27 ёшда. Иккинчидан, у сўнгги икки йилдан буён барқарор ўйин намойиш этмоқда. Ўтган мавсумда "Ницца" таркибида 25 ўйинда 17 гол урди. Бу мавсум эса 29 баҳсда 21 тўп киритди. Учинчидан, Марио ёзда жамоани текинга тарк этиши мумкин. Клуб президенти Жан-Пьер Ривьер жамоанинг бу мавсум еврокубоклар учун курашмаслиги ва Балотеллини жамоадан кетишини тасдиқлади.

4. Жек Уилшир, "Арсенал"
26 ёш, 18 млн евро

Ҳозирча Жекнинг "Арсенал" билан янги шартнома имзолагани борасидаги маълумотларга ишонманг. Клуб ҳали бу борада расман хабар бермади. Британ матбуоти эса томонлар январь ойидан буён музокаралар ўтказишаётгани ҳақида бот-бот маълумотлар тарқатмоқда. Бироқ асосий муаммо - маош. Уилшир айни дамда ҳафтасига 110 минг фунт маош олмоқда. Футболчи бунга арзийди. Аммо унинг ҳали ҳам жамоада қолиш ёки қолмаслиги номаълум.

5. Бернард, "Шахтёр"
25 ёш, 16 млн евро

"Шахтёр"нинг ҳужумкор ярим ҳимоячиси қишдаёқ жамоани тарк этиши мумкин эди. Аммо жамоадагилар "Наполи"дан кўпроқ сўраб юборишди. "Шахтёр" эса футболчига 2013 йили бир мавсум учун 25 млн евро тўлаб берган.


6. Макс Майер, "Шальке-04"
22 ёш, 16 млн евро

Майер - "Шальке"нинг ёш юлдузи. Вундеркинд 17 ёшидаёқ Европа чемпионлар лигасида дебют қилган ва Германия ёшлар терма жамоасига жалб этилганди. 2017 йили у жамоа билан шартнома имзоламади. Унга "Арсенал" ва "Барселона" томонидан қизиқишлар бўлмоқда. Тўғри, Майер ўз позициясини ўзгартирган: ҳужумкор ярим ҳимоячиликдан ҳимоячилардан бироз олдинроққа ўтиб олди. Шундай бўлса-да, у бош мураббий Доменико Тедесконинг олқишларига сазовор бўлди.

7. Милан Бадель, "Фиорентина"
29 ёш, 13 млн евро

Хорватиялик ҳимоячи "Фиорентина"да қолди, унинг шериклари Борха Валеро ҳамда Маттиас Весино "Интер"га кетди. Сўнгги маълумотларга кўра, унга "Спартак" томонидан қизиқишлар бўлмоқда. Аммо футболчи "Рома" билан музокаралар олиб бормоқда.


8. Люк Шоу, "Манчестер Юнайтед"
22 ёш, 15 млн евро

Даҳшатли жароҳат, Моуриньонинг танқидлари - аъло даражадаги футболчининг фаолиятида "қора доғ" бўлиб қолди. Бироқ у 22 ёшда ва фаолиятнинг гуллаган даври энди бошланади. Ёзда Шоу МЮнинг ёшлар таркибида тўп сурди. Моуриньо эса у ҳақида: "Шоу борасида ҳеч қандай муаммолар йўқ. У асосий таркибга кириш учун қаттиқ меҳнат қилмоқда", деди. Рақобатда Эшли Янгга ютқазмоқда ва ўйинлардан четда қолмоқда. У қишда бир неча баҳсларда асосий таркибда майдонга чиқди ва уни Моуриньо мақтади. Ҳозирча томонлар янги шартнома борасида музокаралар ўтказишмаяпти. Агарда ишлар ўхшамаса, футболчи эркин агент сифатида жамоани тарк этиши мумкин.

9. Квадво Асамоа, "Ювентус"
29 ёш, 12,5 млн евро

Балким, Асамоа яхши ҳимоячи ёки ярим ҳимоячи эмасдир. Бироқ у ўйинни ўзига ола билади. Ганалик футболчи бир ўйинда бир неча позицияларда тўп сура олади. Бу мавсумда у Алекс Сандро билан қаттиқ рақобатлашмоқда. Унинг шартномаси ёзда якунланадиган бўлса, "Интер" ёки "Милан" уни харид қилишга тайёр.


10. Маруан Феллайни, "Манчестер Юнайтед"
30 ёш, 12 млн евро

Моуриньога Люк Шоунинг якунланаётган шартномаси борасида савол берсангиз: "Феллайнининг тугаётган келишуви мени кўпроқ безовта қилмоқда", - дейди. Мавсум бошидан буён у бу мавзуни 3 марта кўтарди. Жозе унинг қолишини истайди, бироқ бельгиялик МЮ билан келиша олмаяпти. Британиянинг "The Sun" нашри шундай сарлавҳали мақола чоп этди: "Оғзингни ёп, шартнома имзола".


11. Йоан Кабай, «Кристал Пэлас»
32 ёш, 10 млн евро

"Лилль"да Кабай ўз вақтида энг яхши ярим ҳимоячилардан бири эди. Турли ёшдаги терма жамоаларга чақирилган, 23 ёшли терманинг асосий футболчиси бўлган. Бироқ 7 йил давомида у Англияда юлдузга айлана олмади. Ўтган мавсумда у "Марсель"га ўтишга тайёр эди, аммо "Кристал Пэлас" уни қўйиб юборишни истамади. Унинг шартномаси ёзда якунланади. Томонлар эса ҳали музокаралар ўтказишгани йўқ.

12. Жоау Моутиньо, "Монако"
31 ёш, 10 млн евро

Ўтган мавсумда "Монако"нинг "боғчасида" Моутиньо асосий таркибдаги жойини бироз йўқотгандек кўринди. У муҳим баҳсларда захирадан майдонга қўшилиб, ҳимоячиларга ёрдам берди. Ёзда "Монако" асосий футболчиларини трансфер қилиб юборди. Шу туфайли у яна "бош ролда". 27 турдан кейин майдонда 2 минг дақиқадан зиёд вақтни майдонда ўтказди. Моутиньо деярли алмаштирилмайди. Унинг шартномаси тугайди. Бироқ "Монако" Жоауни қўйиб юборишига ишониб бўлмайди.


13. Жоржо Кьеллини, "Ювентус"
33 ёш, 10 млн евро

Янги шартнома ҳали имзоланмаган. Кьеллини Daily Mail нашрига: "Мен италияликман. "Ювентус"дан кетмоқчимисиз, буни "Ювентус" исташи керак", - деб айтиб ўтган. Corriere della Sera хабарига кўра, томонлар музокара ўтказмоқда.

14. Арьен Роббен, "Бавария"
34 ёш, 9 млн евро

Роббен Юпп Хайнкесс билан мунозараларга бормаяпти. "Бешиктош" билан баҳсда захирада қолган бўлса-да, бош мураббий борасида ҳам ҳеч қандай фикр билдирмади. Қиш ўртасида яна икки-уч мавсум юқори савияда ўйнашни истаётганини айтиб ўтди. Бироқ бу жуда қийин. Шартнома узайтириш ҳақидаги саволга у: "Бу борада хотиржамман", - деди.

15. Хуанфран, "Атлетико"
33 ёш, 8 млн евро

"Атлетико" сардори ва рамзи, Симеоненинг ишонган тоғи. Мадрид жамоасини бу футболчисиз тасаввур қилиб бўлмайди. Қишда Хуанфран "Рома" билан музокаралар олиб борди. Бироқ у ёзда кетиш учун жамоада қолди.

16. Атем Бен-Арфа, ПСЖ
30 ёш, 8 млн евро

Бен-Арфанинг фаолиятида кўнгилсизликлар жуда кўп. Бироқ 30 ёш - фаолиятни тугатишга жуда эрта. Икки йил олдин у "Ньюкасл"га жалб этилди. У ердан "Ницца"га текинга ўтди ва илк мавсумидаёқ 17 гол уриб, 6 бора ассистентлик қилди. Бу мавсум у ПСЖ таркибида бирорта ўйинда майдонга тушмади. Томонлар шартномани узайтиришмайди. Бен-Арфа жамоадан кетади.


17. Златан Ибрагимович, "Манчестер Юнайтед"
36 ёш, нархланмаган

36 ёшли Златан футболдан кетишни истамаяпти. Унинг МЮ билан амалдаги шартномаси шу мавсум якунланса-да, бошқа клуб  шарафини ҳимоя қилишни истайди. Бу борадаги якуний қарорини у яқин орада маълум қилади.

18. Ашраф Хакими, "Реал"
19 ёш, 5 млн евро

Буни кутилмаган ҳолат деса бўлади. Ашрафнинг шартномаси 2018 йил ёзигача мўлжалланган. Бироқ томонлар ҳали янги келишув борасида музокаралар олиб бормаяпти. Бу борадаги расмий хабар ёзгача маълум қилиниши мумкин.

19. Франк Рибери, "Бавария"
34 ёш, 5 млн евро

Карл-Хайнц Румменигге қишда: "Роббен ва Рибери жамоа учун керак. Улар орқали барча энг яхшиси бўлиш учун интилмоқда", - деди. Мавсум бошидан бери у чемпионатнинг 12 ўйинида майдонга тушди ва 2 гол киритди. У ҳам Роббен каби жамоа афсонаси. Аммо уларнинг "Бавария"даги келгуси тақдири ҳал бўлмаган.

Миржалол Норматов таржима қилди