Хосе Мария Мендез: "Мундиал йўлланмаси учун 3та даъвогар аниқ"

- Жаноб Мендез, Қатарга қарши ўйинлар ҳақида нима дея оласиз?
- Декабрь ойи бошида Қатарга қарши иккита ўйин ўтказиб қайтдик. Дастлабки учрашувда мезбонлар 5:4 ҳисобида ғолиб бўлишди. Иккинчи баҳсда жамоамиз 3:2 ҳисобида зафар қучди. Олдин бу жамоа футзалда у қадар кучли эмас эди. Ҳозир Қатар сафида уч нафар бразилиялик ва бир нафар мисрлик футзалчи ўйнамоқда. Шу боис ҳам бу жамоа Жаҳон чемпионати йўлланмаси учун даъвогарлар орасига қўшилди деб бемалол айта оламан. Улар февраль ойидаги қитъа чемпионатида сюрприз қилиши мумкин.

- Осиё чемпионатида жамоалар Колумбиядаги мундиалга 5та йўлланма учун кураш олиб боришади. Сизнингча бу борада фаворитлар қайси жамоалар?
- Тан олиш керак Осиёда энг кучли учта жамоа бор: Эрон, Япония ва Таиланд. Эрон ва Япония нафақат қитъамизда, балки жаҳонда ҳам ўз ўрнига эга жамоалардир. Мана шу термалар мундиалга бериладиган 3та йўлланмага энг асосий даъвогар ҳисобланишади. Қолган икки йўлланма учун Ўзбекистон, Ливан, Вьетнам, Австралия, Қатар ва Хитой кураш олиб боради. Табиийки биз ўз мухлисларимиз қаршисида илк бор Жаҳон чемпионати йўлланмасига эга чиқиш учун ўйнаймиз, - дейди Мендез.

Эслатиб ўтамиз, футзал бўйича Ўзбекистон терма жамоаси февраль ойида Тошкентда ўтадиган Осиё чемпионатида иштирок этади. Унда Хосе Мария Мендез шогирдлари "A" гуруҳида Ливан, Қирғизистон ва Саудия Арабистони билан кураш олиб боради.

Жасур Асланов ёзиб олди