"Хитойлик Руни" Ўзбекистон билан ўйин олдидан қандай фикрда?

Хитой терма жамоаси ярим ҳимоячиси Ванг Ёнгпо (14-рақам) ФИФА расмий сайтига интервью бериб, бўлажак баҳс олдидан ўз фикрини билдирди.

Шуни айтиш лозим, бу футболчини мухлислар Хитойда "Хитойлик Руни" деб чақиришади. Хитой ўз майдонида Жанубий Кореяни 1:0 ҳисобида мағлуб этганида айнан унинг тўп узатишидан сўнг Ю Дабао ягона голни урганди. 

2015 йилдан бери терма жамоада ўйнаб келаётган "Хитойлик Руни" шундай дейди: 

- "Биз Ўзбекистон термасини мағлуб этиш учун бор кучимизни ишга соламиз. Мақсад - фақат ғалаба. Ўйинни ютиб ўз мухлисларимизга қувонч улашишни хоҳлаймиз. Ўзбекистон - кучли рақиб, менга бу жамоа ёқади. Улар яхши шаклланган ва футболни ҳам яхши ўйнашади". 

Ванг Ёнгпо бунгача "Шандонг Луненг" сафида тўп тепиб келаётганди. Эндиликда у "Тиянжин" клуби аъзоси ҳисобланади. Уни янги жамоага шахсан бош мураббийи Фабио Каннаваро таклиф этган. 

Яна бир қизиқ жиҳати, "Хитойлик Руни" 30 ёшида терма жамоага иккинчи бор Марчелло Липпи томонидан чақирув олди. У Липпи қўл остида биринчи бор Жанубий Кореяга қарши майдонга тушиб, бу ўйинда хитойликлар 1:0 ҳисобида ғалаба қозонишди. Ванг Ёнгпо италиялик мураббийга қуйидагича таъриф берди: 

- "Марчелло Липпи мураббий сифатида жуда кучли шахс. У бизга кўпроқ ҳужум қилиш ҳамда охиригача ўйнаш кераклигини айтади. Орқага ётиб олсак унга ёқмайди. Олдинлари биз биринчи голни уриб олгач орқада ўйнардик. Лекин Липпи яна ҳужумга ўтиш кераклигини айтмоқда. Тўғри, бизда имконият кам, лекин охиригача курашамиз. Буни мураббийимиз ҳам тинмай таъкидлаяпти".