Хитойда трансфер ойнаси ёпилди. Хитойликлар ёзда қанча сарфлашди?
19 июл 2017 15:16
Янгиликлар

Хитойда трансфер ойнаси ёпилди. Хитойликлар ёзда қанча сарфлашди?

Бир неча кун олдин Хитой Суперлигаси клублари учун ёзги трансфер бозори ўз якунига етди.

Бутун дунё юлдузларини ўз сафига қўшиб олишга уринган Хитой чемпионати "аждарлари" сўнгги трансфер ойнасида жуда кам "олов" сарфлади. Ёзги трансфер мавсумида хитойликлар бор-йўғи 28 млн. евро сарфлашди.

Хитой Суперлигаси раҳбариятининг легионерлар сонини 4 тадан 3 тага камайтириш ва харид қилинган ҳар бир футболчи учун сарфланган пул миқдорида 100% лик солиқ тўлаш кераклиги ҳақида қарорлардан сўнг, хорижлик футболчилар импорти сезиларли даражада камайди.

Хитой чемпионати Ўзбекистон олий лигаси каби март ойида бошланиб, ноябрь ойида якунланади. Шу сабабли, февраль ойида Хитой клублари трансферлар учун 403 млн. евро сарфлашди.

Бироқ ўша йирик харажатлар ўз якунига етган кўринади. Сўнгги маротаба бундай кам сарфлар 2014 йилнинг ёзида қайд этилган. Ўшанда хитойликлар 27,5 млн. евро сарфлашган.

2017 йилнинг ёзида 28 млн. евронинг катта миқдори Адриан Рамос (12 млн. евро), Антони Модест (5,7 млн. евро), Бенжамин Муканжоларга (5,5 млн. евро) сарфланди.

Хитой клублари харид қилган футболчиларнинг фақат бир неча нафари ўз пулига яраша ўйин кўрсатмоқда. Улардан бири Халк (15 та гол) бўлса, иккинчиси Эран Захави (14 та гол).

Ҳавола :

Манба : marca

Янгиликларни Телеграмда ўқинг!

Рейтинг: +3