Вали Султонов: “Хоразм”га яна қайтганимдан хурсандман”

Маҳаллий мураббий аслида жамоа учун бегона эмас. Боиси Султонов илгари ҳам “Хоразм”ни бир неча мавсум бошқарганди. Куни-кеча яна қадрдон жамоасига қайтган Султонов билан шу ҳақда суҳбатлашдик.

- Билсангиз керак, бу йил жамоанинг иштироки қониқарли кечмаяпти. Айниқса иккинчи босқичда кутилган натижа рўй бермади – дея гап бошлади Вали Султонов. – Шу боис клуб раҳбарияти куни-кеча мени яна жамоа бошқарув постига таклиф қилди. Бунга табиийки “лаббай” деб жавоб бердим. Чунки “Хоразм” мен учун қадрдон клуб. Бу ерда олдин ҳам ишлаганман. Яна семили жамоамга қайтганимдан хурсандман.

- Бунгача қандай ишлар билан машғул эдингиз?
- 2012-2013 йиллар давомида “Насаф” ёшлар жамоасида ишладим. У ерда Баҳодир Аннаматовга яқиндан ёрдам бердим. 2014 йилнинг бошига келиб эса амалдаги шартнома якунига етди ва мен Урганчга қайтдим. Шундан сўнг вилоятимиздаги футбол мактаб интернетида ёш болалар билан ишладим. 1999 йилда таваллуд топган йигитлардан иборат гуруҳни беришгач, улар билан астойдил ишладим.

- Болалар футболида ишлаш қандай кечди?
- Ёмон эмас. Биласизми ёшлар билан кўпроқ техник жиҳатлар борасида ишладим. Шунингдек турли тактик услубларни ўзлаштириб бордик.

- Эндиликда интернатдан бутунлай кетган бўлсангиз керак?
- Ҳа. Икки жойда ишлаш кишини жисмоний жиҳатдан толиқтириб қўяди. Шу боис эндиги ўй ҳаёлим “Хоразм”га қаратилган.

- “Хоразм”нинг бугунги таркиби борасида фикрингиз қандай?
- Таркиб чакки эмас. Олдин юқори лигада ўйнаган йигитлар кўпчилиги. Фақат улар билан ишни тўғри йўлга қўя олиш асосий ўриндаги масаладир. Ҳозирча улар билан икки марта машғулот ўтказдик. Шу аснода уларнинг жисмоний холатини яхшилашга уриндик. Умуман олганда таркибдаги футболчилар билан илгари ҳам бирга ишлаганим учун тез тил топишиб кетдик.

- Маҳаллий мухлислар “Хоразм”нинг бу йил олий лигага қайтишини кутганди. Бироқ...
- Дарҳақиқат, жамоа олий лигага чиқса хурсанд бўламиз. Барибир элита вакиллари билан ўйнаш ҳар доим қизиқарли кечади. Афсуски бу йил яна кучлилар сафига қайтиш имкониятимиз пасайиб кетди. Деярли имконият қолмади ҳисоб. Чунки олдиндаги рақиблар очколар борасида анча илгарилаб кетган. Шу боис энди эътиборни ёшларни тарбиялашга ва имкон қадар мавсумни 6-ўринда якунлашга қаратамиз.

- Келаси йил жамоа олий лигага чиқиш учун курашиши мумкинми?
- Бу кўпроқ раҳбарият томонидан қўйиладиган вазифага боғлиқ. Агарда шундай мақсад қўйилса, бунинг учун бор кучни ишга соламиз.
 

Исломбек Рустамбеков суҳбатлашди