Вали Султонов: “Орол” жамоаси устидан ғалаба қозонганимиздан хурсандмиз"

Жумладан, Урганч шаҳрининг “Хоразм” жамоаси сафарда “Орол” жамоаси билан куч синашди. Бу ўйин урганчлик футболчиларнинг 1:0 ҳисобидаги ғалабаси билан ниҳоясига етди. Учрашув тугагач, меҳмонлар жамоаси бош мураббийи Вали Султоновнинг фикр-мулоҳазалари билан қизиқдик.

- Қўшни ҳудуд, яъни Қорақалпоғистон Республикаси ва Хоразм вилоятининг бош жамоалари ўртасидаги беллашув азал-азалдан муросасиз ўтиши билан маълум, - дейди В. Султонов. – Ҳоҳ Нукусда, ҳоҳ Урганчда бўлсин мазкур жамоаларнинг ўзаро баҳси ўзига хос дербига қиёсланади. Бу ҳол жамоаларимиз ўртасидаги ўйиннинг доимо ҳужумкор ва кескин ўтиши билан исботини топади. Мавсум бошида ўз майдонимизда нукуслик футболчиларни 2:0 ҳисобида мағлубиятга учратгандик. Шу жиҳатдан, сафардаги учрашувимизда мезбонлар реванш олишга интилишини билардик. Шуларни ҳисобга олиб, тайёргарлик кўргандик. Саъй-ҳаракатларимиз бесамар қолмади. Жорий йилги мавсумдаги иккинчи учрашувда ҳам қўлимиз баланд келди. Бундан хурсандмиз, албатта. Умуман, “Орол” билан кечадиган мазкур ўйинни сариқ карточкалари туфайли асосий дарвозабонимиз Ғайрат Ўдаев ўтказиб юбориши лозим эди. Бу бизга муаммо туғдирарди. Шу куни уни ўрнини захира дарвозабонимиз Равшан Жуманиёзов эгаллади. У ҳали ёш бўлишига қарамай, ишончимизни оқлади. Умуман, барча футболчиларимиз ўзларига топширилган вазифани муносиб уддалашди. Бунинг учун уларга миннатдорчилик билдираман. Қолаверса, узоқ йўл босиб Нукусга келиб “Хоразм” жамоасини қўллаб-қувватлаган кўп сонли мухлисларимизга ҳам раҳмат айтаман ва уларни жамоамизнинг навбатдаги ютуғи билан табриклайман.

Икром  ХУДОЙБЕРГАНОВ.