Украина футзал терма жамоаси бош мураббийи: "Мақсадимиз қийин ҳолатдаги украин халқини бироз бўлса ҳам хурсанд қилиш"

- Авваламбор Ўзбекистонга хуш келибсиз. Украина терма жамоасига қанчалик тайёр? Дастлабки рақиб Аргентина терма жамоасини ўрганиб чиқдингизларми?

- Шубҳасиз, Аргентина жуда кучли терма жамоа. Бизни қийин учрашув кутиб турибди. Биз таркибимизни анча янгиладик ва ҳозирги таркибимизда аввалроқ мундиалда иштирок этган икки нафар футзалчи бор, холос. Ёш футзалчиларимиз ушбу мусобақада дебют қилишади. Биринчи учрашувда жамоа қандай ҳолатда эканлигини билиб оламиз. Муҳими, жамоа ўз ўйинини ва иштиёқини йўқотиб қўймаслиги. Аргентинадек кучли терма жамоага қарши ҳам ўйнаш олишимизга ишонаман. Фақатгина ўзимизга бўлган ишончни йўқотмаслигимиз керак.

- Гуруҳдаги бошқа жамоалар ҳақида фикр билдириб ўтсангиз? Аргентина 2016 йилги Жаҳон чемпиони. Ангола терма жамоасида эса португалиялик бош мураббий бор ва жамоанинг етакчилари Португалия чемпионатида тўп тепишади. Афғонистон терма жамоаси ўз тарихида биринчи маротаба мундиалда иштирок этаётганига қарамай, улар қўшни мамлакат Эрондан кўп нарсани қўллашди ва Эрон футзали каби ривожланишмоқда.

- Ангола ва Афғонистон терма жамоаларининг ўйинларини кўриб чиқдик ва улар намойиш этаётган ўйин мени ҳайратга солди. Жаҳон чемпионатида кучсиз жамоанинг ўзи йўқ деб ўйлайман. Ҳар бир жамоа ҳар ким учун етарлича муаммо туғдириши мумкин. Осонлар ўйинлар бўлмаслигини биламиз ва шунга тайёрланиб боряпмиз.

- Украина терма жамоаси учун қайси босқич муваффақиятли натижа дея қабул қилинади?

- Бизда аниқ бир мақсад йўқ ва мен буни кўп маротаба айтиб келяпман. Биз ўйиндан ўйинга кучайиб боришни мақсад қилганмиз. Энг аввало гуруҳдан чиқиб олишимиз керак, кейин эса ким рақиб бўлишига қараган ҳолда ўйнаймиз. Муҳими, биз ушбу мусобақага тайёрмиз. Ўзбекистонда қанча вақтга қолишимизни вақт кўрсатади. Мақсадимиз ушбу қийин паллада украин ҳалқини бироз бўлса ҳам хурсанд қилиш.

Абдулвосит Бектемиров суҳбатлашди

Эслатиб ўтамиз, Украина футзал терма жамоаси Жаҳон чемпионатидаги дастлабки учрашувини Аргентинага терма жамоасига қарши ўтказади, учрашув бугун соат 20:00да "Ҳумо Арена"да ўтказилади.