Тимур Кападзе: “Хитойни ютсак, Жанубий Корея билан ҳақиқий жанг бўлади”

-  "Металлург"га қарши учрашувда 2:1 ҳисобида ғалаба қозондинглар. Бекободликлар "Локомотив" учун ноқулай рақиб ҳисобланади. Ушбу жамоага қарши учрашув қанчалик қийин бўлди?

-  Тўғри “Металлург”га қарши ҳам доим курашларга бой қийин учрашув бўлган. Ғалаба қозониш биз учун осон бўлмади. Биринчи бўлиб ҳисобни очганимиз биз учун фойдали бўлди. Рақиб дарвозасига иккинчи голни урганимиздан сўнг ғалаба қозонишимизга шубҳа қолмади.

-  Бу йилги чемпионатимиз қай даражада ўтмоқда деб ўйлайсиз?

-  Бу йилги чемпионатимиз анча қизиқарли ва курашларга бой тарзда ўтмоқда. Бошланишидан “Динамо” кейин “Қўқон-2912” ҳозир эса “Бухоро” клуби бизни тақиб қилиб келмоқда. Бизга қараганда қолган жамоаларда очколар фарқи унчалик катта эмас. Бу эса чемпионатда қизғин кураш бўлаётганининг исботи.

-  Олдимизда турган Хитой терма жамоасига қарши учрашув олдидан қандай фикр билдирасиз? Биз Марчелло Липпи бошқараётган терма жамоани мағлуб эта оламизми?

-  Тўғри, миллий терма жамоамизни иккита муҳим ўйинлар кутмоқда. Мени фикримча ҳозирда энг муҳими бу Хитой терма жамоаси. Чунки меҳмонда ғалаба қозонсак бизни 5 сентябрь куни ҳақиқий жанг кутади. Шу жумладан ҳозир ҳамма кучни ва бор эътиборни Хитой билан бўладиган ўйинга қаратиш зарур. Хитой терма жамоасини Тошкентда мағлуб этганмиз, терма жамоамиз улардан ҳар тарафлама устун эканлигини кўрдик. Лекин ҳозирги кунда Хитой терма жамоаси янги мураббий қўл остида бизга қарши қандай ўйин кўрсатишини ҳеч ким олдиндан айтиб бера олмайди. Ўзбекистон терма жамоаси фақат ғалаба ҳақида ўйлаши керак ва сафардан 3 очко билан қайтиш керак. Ўз уйимизда эса Жанубий Корея билан бўладиган учрашувда мухлисларимизнинг қўллаб-қувватлаши билан кореяликларни мағлуб этамиз. Чунки мен футболчиларимизга ишонаман. Уларни ҳар доим қўллаб-қувватлашимиз керак. Терма жамоамизга олдинда турган иккин ўйинда омад тилайман. 

Жаҳонгир Сотволдиев суҳбатлашди