Суперлигада баҳорги уйғониш азоби

Ҳаммаёқда иш қизғин, кўклам шукуҳи қалбларни ишлашга ундаётган палла. Айрим мамлакатларга нисбатан бизнинг футболда баҳор уйғониш, янги мақсадлар билан йўлга чиқиш пайти саналади. Клублар қамишдан бел боғлаб Суперлига карвони сари ҳаракатни бошлашади. Лекин нима учундир бу сафар жамоаларнинг илк турдаги ўйинларидан кўнгиллар тўлмади. Футбол байрамининг давомли бўлишига эса том маънода жамоалар айбдор. Эътибор беринг биринчи турдан ўрин олган 7та ўйиннинг 3тасида гол кўрганимиз йўқ. Сал қолса Яйпандаги водий дербиси ҳам 0га қараб кетаётган эди. Бекободдаги ўйинда ҳам 1та гол кўрдик. "Навбаҳор" - "Насаф" ўйинида стадион чинакамига "портиллади". Аммо бу майдондаги футболчиларга кўчмади. Самарқанд ва Олмалиқда хайтовур 2тадан тўп киритилди. Иккинчидан ҳужумчилар отни илгарироқ қамчилаш вақти келди. Бугун урмасангиз, эртага урмасангиз яна қачон гол урмоқчисиз. 

Суперлига. 1-тур томошабинлар ташрифи. Наманган биринчи, Самарқанд иккинчи...

"Қуруқ старт". 7 ўйин — 6 гол

Биз стартдан шуни кутганмидик? Клубларимизга уйғониш учун қанча вақт керак? Баҳорги уйғониш шунчалар қийинми? Яна 2та турдан сўнг ФИФА кунлари бошланади. Кейинги турларда ҳам шу ҳолат кузатилгудек бўлса, терма жамоага футболчилар қандай етиб боришини ўйлайверинг. Биз Суперлигадаги голларни санаб ўтирган жойимизда Про лигада аллақачон 2та ўйинда 6та гол дарвозалардан ўрин олди. Демак қуёш Суперлигадан эмас, Про лига томондан чиқди. 

2-тур ҳозирги мулоҳазаларимни бироз ўзгартириб юборишига умид боғлайман. Бошқа иложим ҳам йўқ. 

А. Искандаров