Сунъий қўллаш оқибати ёхуд "Нефтчи" "Цементчи"нинг касрига қолдими?

Мана 8та тур ўтдики, "Нефтчи" ҳали ғалаба қозонгани йўқ. Суперлигада умуман ютмаган ким десангиз, ҳамма "Нефтчи" дейди. Жамоа учта дуранг ўйнаб, беш марта ютқазди. Қолаверса, атиги битта гол урди холос. (Бу гол ҳам рикошет сабаб киритилди). Бу аҳволда "Нефтчи" яна қуйи дивизионга тушиб кетадиган кўринади.

Аслида бу клуб мавсумни Про-лигада ўтказиши керак эди. Лекин шароити яхши деб жамоа Суперлигада олиб қолинди. Аниқроғи, воқеа сал бошқача бўлди. Ўтган йил биринчи лигани "Цементчи" пешқадам сифатида тугатди. Биринчи лига ҳам алоҳида расмий турнир эмасми, бунинг ҳам ўз совриндорлари ва аутсайдерлари бўлади.

Хуллас "Цементчи" чемпион бўлди ва биринчи лига чемпиони сифатида ҳақли равишда Суперлига йўлланмасини қўлга киритди. "Цементчи" ҳатто Суперлигага тайёргарлик кўришни бошлаб юборганди: жамоада пул бор, ҳаммаси жойида деган гапларни эшитгандик. Аммо нимадир бўлди-ю, орадан кўп ўтмай "Нефтчи" Суперлигага қайтарилди, "Цементчи" мураббий-у дўхтирлари билан хуллас ҳамма "Нефтчи"га кўчиб ўтди.

Ўтган йилги "Нефтчи" аллақачон тарқатиб юборилганди. Ҳозирги "Нефтчи" аслида "Нефтчи" эмас, балки ўтган йилги "Цементчи"нинг энг катта бўлаги. Фақат футболчилар "Нефтчи" формасини кийиб ўйнашяпти. Футболимиз шу даражада қизиқки, ҳозир ўтган йилги биринчи лига чемпиони ҳеч қаерда йўқ! Эътибор беринг-а, биринчи лигани пешқадам сифатида тугатган "Цементчи" ҳозир на Суперлигада, на Про-лигада бор.

Биз-ку вазиятдан хабардормиз, лекин жаҳон футболи статистикаси билан шуғулланадиган хорижлик журналистлар бечора "Цементчи"ни ҳеч қаердан топа олмай ҳайрон бўлиб ўтиришган бўлса керак. Тўғри-да, чемпион жамоа қаёққа йўқолиб қолди? 

Бир айланиб "Нефтчи" футболкасини кийиб олган йигитлар ўзларини кўрсата олишмаяпти. Бу эса ўйиндан ўйинга Фарғонадаги стадионга камчилик одамлар келишига сабаб бўлмоқда. Энди тасаввур қилиб кўрамиз, агар "Нефтчи"нинг ўрнида "Цементчи" бўлганида натижа яхши бўлармиди?

Балки яхши бўларди, балки бўлмасди, лекин бу ўринда муҳими шуки, натижа қандай бўлмасин "Цементчи"ники сифатида қабул қилинарди. Биз тушунардик, агар "Цементчи" Суперлигада иштирок этиб энг охирги ўринда юрса дебютант, тажрибаси кам дердик, бироз вақт лозим дердик. Аммо бу жамоа - "Нефтчи", таркибида кимлар ўйнаётганидан қатъий назар клубнинг номи ўша шонли "Нефтчи". Шу боис ҳам "Нефтчи" деб қарашга, ҳар бир натижасини "Нефтчи"ники деб аташга мажбурмиз. 

Балки айтишингиз мумкин, иккаласи ҳам Фарғона вилояти жамоаси, нима фарқи бор деб. Бор фарқи. Фарқи шундаки, "Цементчи"нинг олий лигага чиқишида ҳисса қўшган одамлар бор эди ва улар "Цементчи"ни яхши кўрарди. Мен бу ўринда мураббий ва футболчиларни айтмаяпман. Оддий ишчилар ҳақида гапиряпман. Улар майдонга қарашарди, овқат пиширарди, стадионни тозаларди ва ҳоказо. Улар ўз жамоаларини "Цементчи" деб билишарди. Бу жамоанинг ўзига яраша мухлислари бор эди. Энди улар "чи" қўшимчасини жойида қолдириб, "цемент" ўрнига "нефт" дейишга мажбурми?

"Нефтчи"нинг ҳам ўз мухлислари бор бўлиб улар жамоа "Нефтчи"лиги учун яхши кўрарди. Вилоятда, шаҳарда дербилар доим бўлгани яхши. "Нефтчи" ўз йўлини танласин, "Цементчи" ўз йўлини. Баъзан эшитиб қоламиз, ҳар бир вилоятдан биттадан жамоа етади. Агар шароити кўтарса нега энди иккита клуб ўйнамаслиги керак? Одамлар футболни аввало рақобат бўлгани учун кўради. Агар "Нефтчи" рақобат қилмасдан ҳаммага ютқазиб юраверса бу жамоанинг ўйини кимга қизиқ? 

Наҳотки ҳозирги "Нефтчи" ўтган йилги "Цементчи"нинг касрига қолган бўлса? Мана, "Металлург" билан ўйиндан кейин жамоа катта мураббийи Абдумалик Ҳакимов ҳатто дарвозага кириб бораётган тўплар қайтяпти деган гапни айтиб ўтди. Ахир бу бежиз бўлмаса керак. Шунча ўйинда битта гол урилгани мавжуд ҳолатни кўрсатиб турмаяптими? "Нефтчи" футболчилари машғулотларда кам ишлашяпти деган фикрдан йироқмиз, улар эҳтимол ҳаммадан кўп тер тўкаётган бўлиши мумкин. Чунки жамоанинг ҳозирги ҳолати барчага маълум. Лекин омад очиқчасига, ҳатто уйдаги ўйинларда ҳам юз ўгираётган экан демак, бу ерда бир гап бор. 

Хўш, бу борада Сиз қандай фикрдасиз?