Сирожиддин Қўзиев: "Нефтчи"даги фаолиятим яхши ўтди"

Футболчи Малайзия Суперлигаси иштирокчиси "Кучинг Сити" билан шартнома имзолади. Шундан кейин у сайтимиз учун фикрларини билдирди. 

- Сирожиддин, "Кучинг Сити" варианти қай тариқа юзага келди?

- Бу клубнинг юзага келишида "Машъал" клуби бош директори Илҳом ака Қурбоновнинг ҳиссалари катта бўлди. Айнан у инсон "Машъал"да ишлаган агентга мени тавсия қилган. Кейинчалик ўша агент "Кучинг" вариантини топди. Шу ўринда Илҳом акага миннатдорчилик билдираман. 

- Бу қарорга бирданига келдингизми?

- Йўқ, албатта. Таклиф борасида ўйлаб кўрдим. Отам билан маслаҳатлашдим. Кейин "Нефтчи" сафида иккинчи даврада кам ўйин амалиётига эга бўлдим. Шу жиҳатлари ҳам "Кучинг Сити" таклифини қабул қилишимга асосий туртки бўлди. 

- 2022 йилги мавсум "Нефтчи"да ўтказган фаолиятингиз сизда қандай таассурот қолдирди?

- Яхши бўлди. Ёмон ўтди дея олмайман, чунки футболчи сифатида ўсишга эришдим. Жамоа мухлислари мени ҳурмат қилишди, қўллаб-қувватлашди. "Нефтчи"да ўтказган ўйинларим сабаб ҳозирда легионерга айландим. Камчиликлар ҳам бўлди, лекин уларни бартараф этишга уринаман. Бир сўз билан айтганда, "Нефтчи"даги фаолиятимдан қониқиш ҳосил қилдим. Янги мавсумда фарғоналикларга омад тилайман. 

- "Кучинг Сити"ни танлашингизга “Нефтчи” устозининг муносабати қандай бўлди?

- Тўғриси, бош мураббий қароримни қўллаб-қувватлади. Хориждан таклиф бўлгани учун ҳам ўзимни кўрсатишим кераклигини таъкидлади. Бунинг учун бош мураббийга миннатдорчилик билдираман.