“Шўртан” ФКнинг "Малибу", "Ласетти", "Матиз" ва автобуси МИБ томонидан хатланди

Бу ҳақда Телеграмдаги “Qarshiliklar” (t.me/Qarshiliklar_Rasmiy) канали Мажбурий ижро бюроси Қашқадарё вилояти бошқармаси Жамоатчилик билан алоқалар ва ҳуқуқий ахборот тармоғига таяниб хабар бермоқда.

“Шўртан профессионал футбол клуби” Қарши туманлараро иқтисодий судининг 7.09.2019 йилдаги ижро варақасига асосан 110 миллион 663 минг 983 сўм ҳамда 27.09.2019 йилдаги ижро варақасига асосан 358 миллион 344 минг 988 сўм, жами салкам 470 миллион сўм солиқдан қарздорлиги мавжуд эди.

Огоҳлантиришларга қарамасдан, клуб қарздорликни бартараф этмагач, Мажбурий ижро бюроси Қашқадарё вилоят бошқармаси томонидан мажбурий тартибда ундириш белгиланди.

Жорий йилнинг 17 декабрь куни клуб раҳбари бошқарувидаги Малибу ва Ласетти ҳамда клубга тегишли бўлган Матиз русумли енгил автомашиналар ҳамда автобус хатлаб олинди.

Агар клуб   Бюро томонидан белгиланган муддатда қарздорликни бартараф этмаса, бу автомашиналар сотувга қўйилиб, тушган маблағ орқали қарздорликни қоплаш чоралаши кўрилади” дея хабар бермоқда Телеграм ижтимой тармоғидаги “Qarshiliklar” (https://t.co/U205kdGpuT)  канали.

Эслатиб ўтамиз, декабрь ойи бошида клубга - бир неча йиллар "Насаф"да ишлаган Шамил Ярулин бош менежер, "Насаф"нинг собиқ сардори  Ботир Қораев бош мураббийи этиб тайинланганлиги ҳақида хабарлар чиққанди. Аммо кейинчалик клуб матбуот хизмати клуб расмий сайтида ушбу хабарлар асоссиз эканлиги ҳақида (http://fcshurtan.uz/?p=9942 ) расмий баёнот берганди.