Сергей Лушчан: "Тенг кучли жамоалар кураши гувоҳи бўлдик"

- Ўйин ҳақида фикрингиз?

- Биз учун жуда қийин бўлди. Айтарли ҳеч нима ўхшамади, айниқса ҳужумда. Бу нима билан боғлиқ, таҳлил қилиб кўрамиз. Рақиб ҳам кўп вазиятлар яратди дея олмайман. Тенг кучли жамоалар кураши гувоҳи бўлдик. Яккакурашлар кўп бўлди, балки ютмаганимизга майдон халақит бергандир, бир нарса дея олмайман. Шунга қарамай футболчиларга раҳмат айтдим.

- Русланбек Жиянов захирага олинишига нима сабаб бўлди?

- Чунки у биз кутган ўйинни намойиш қилмади. Жиянов, Мирсаидов жамоамиз билан асосий йиғинда бўлишмади, уларнинг иккиси деярли машғулот ўтказмади. Бир ой ҳеч нима қилмасдан фақат дам олишди. Худди шунингдек, бошқа футболчилар ҳам машғулотларда тўлиқ иштирок этмади. Болтабоев бир ойни ҳужжатларини тайёрлаш билан ўтказди. Хуллас, ҳозирги таркибда машғулотда қатнашмаган 7-8 футболчи ўйнаяпти. Шунинг учун зўрға дуранг қайд этаётганимиздан ҳам хурсандман. Жамоада нима бўлаётганини билиш учун жамоанинг ичида бўлиш керак. Мен жамоа ичида бўлганим учун ҳаммасини биламан.

- "Навбаҳор" кетма-кет учта ўйиндан бери ғалаба қозона олмаяпти. Бунинг сабаби нимада? 

- Бу жамоанинг функционал ҳолати билан боғлиқ. Биринчи давра охирларида 10 нафарга яқин ёшларни мажбуран асосий таркибга ўтказдик, чунки захирамизда ҳеч ким қолмаганди. Мана ҳозир кўряпсиз, ёшлар ўзини кўрсатишга ҳаракат қиляпти. Биз режа бўйича ишлашда давом этяпмиз. Албатта, ақллилар ҳам бор, бизга нима қилиш кераклигини ўргатадиган. Лекин мен уларга қулоқ солмайман.

- Бугунги мухлислик ва перформанс сизга ёқдими? 

- Тўғриси, ўйин пайти диққат эътиборимни фақат майдонга ва футболчилар ҳаракатига қаратаман. Баъзан бақиришади, аммо мен эътибор бермайман, баъзан тушунмайман ҳам. Мухлислик ҳар доим жамоага нисбатан бир хил бўлиши керак. Ютганда қарсак чалиб, ютқазганда сўкиш фан-клубнинг иши  эмас. Бу мухлислик маданиятига умуман тўғри келмайди.

- Янги келган ўйинчилар ҳақида нима дея оласиз?

- Уларнинг жамоамизга келганига энди 10 кун бўлди. Озроқ вақт керак, кейин улар ҳам ўзларини кўрсатади. Бу йил бизга осон бўлмаяпти, бошидаги 7та турни жуда қийналиб ўтказдик. Мен янги келганларга тўлиқ ишонаман.

- Кетганларни ушлаб қолса бўлармиди? 

- Ижарага кетганлар бўлди ва уларни ўзимиз қўйиб юбордик. Кимгадир 200 баравар кўп маош таклиф қилишди ва у кетди. Бу нормал ҳолат. Яхши таклиф бўлса футболчи кетади.

- 25 август куни яна "Сўғдиёна"га қарши баҳс олиб борасиз.

- Футболчилар ўзгармайди, 20 нафар ўйинчи қайдномадан жой олади. Лекин қанақа ўйин кўрсатишимизни вақт кўрсатади.