Сардор Рашидов: Жамоамизнинг аҳиллиги ғалабамиз омили бўлди

"Бунёдкор” ярим ҳимоячиси олмалиқликлар дарвозасига бир-биридан чиройли учта гол уришдан ташқари, бутун ўйин давомида бемалол 2-3 нафар футболчиларни алдаб ўтиб, рақиб жамоага ҳақиқий бош оғиқ бўлди. Учрашув якунлангач, Сардор Рашидовнинг ўйин борасидаги фикрлари билан қизиқдик.

- Ғалаба қозониб ярим финалга йўлланма олганимиздан хурсандман. Голларим “Бунёдкор”га фойда келтиргани эса хурсандчилигимни икки ҳисса оширди. Очиғини айтсам, ҳозирча фаолиятимдаги илк хет-трикни айнан Олмалиқдаги баҳсда расмийлаштирдим. Бунгача ҳеч бир жамоа дарвозасига бир ўйинда учта гол урмагандим. “Олмалиқ” жамоасига ҳурматимни сақлаган ҳолда шуни айтмоқчиманки, сафарда ғалаба қозонишимизга ишонгандим. Бироқ бу қадар йирик ҳисобда ютишимизни кутмаганим рост. Жамоамизнинг аҳиллиги ва ҳамжиҳатликда ҳаракат қилганимиз ғалабамиз омили бўлди. Шунингдек, мураббийлар штабининг тўғри кўрсатмалари ҳам ўйинимизни анча кучли бўлишини таъминлади, - дейди Сардор Рашидов.