Самвел Бабаян: "Бу учрашув Суперлигадаги сўнгги баҳсимиз каби қизиқ ўтди"
14 авг 2023 20:35
Янгиликлар

Самвел Бабаян: "Бу учрашув Суперлигадаги сўнгги баҳсимиз каби қизиқ ўтди"

"Арал" ҳамда "Навбаҳор" ўртасидаги Ўзбекистон Кубоги 1/8 финал учрашувидан (0:2) сўнг меҳмон жамоа устози Самвел Бабаян матбуот анжуманида иштирок этди.

"Навбаҳор" мухлисларини ғалаба билан табриклайман. Ўта муҳим баҳс оғир ўтди. "Арал"ни Нукусда мағлуб этиш осон деб ўйлаганлар адашади. Буни жуда катта қийинчилик билан амалга оширдик. Бу учрашув Суперлигадаги сўнгги баҳсимиз каби қизиқ ўтди. Ғалаба қозониб, кейинги босқичга чиқишимиз жуда муҳим эди. Аввалги баҳсда мағлубиятга муносиб эмас эдик, шу сабабли ушбу ғалаба руҳий тушкунликдан чиқиб кетишга ёрдам берарди. "Арал" ҳақида алоҳида тўхталмоқчиман. Улар ҳақиқий жангчилардек ҳаракат қилишди, мухлислар учун ўйнашди. Агрессив, замонавий ўйин намойиш этиб, вазифамизни қийинлаштиришди. Ўз навбатида бу регионни ҳам Суперлигада жамоаси бўлишини тилайман. "Арал" бу ёки келаси йил олий лигага чиқишини хоҳлардим".

- "Навбаҳор" чемпионатдаги сўнгги ўйинда "Пахтакор"га мағлуб бўлганди. Ўша мағлубиятнинг бугунги баҳсга таъсири бўлдими?

- Ҳа, таъсири бўлди. Бироқ йигитлар майдонга чиқиб, ғалабани қўлга киритишди.

- "Арал" таркибидан кимни ўз жамоангизда кўришни хоҳлаган бўлардингиз?

- Барча чизиқларда яхши йигитлар бор. Улар ҳаволаниб кетмаслиги учун исмларни айтмайман. Футболчиларнинг даражаси Суперлигада ўйнашга етади. Жамоанинг муваффақиятларида Неъматилло Қуттибоевнинг хиссаси катта деб биламан. Бу жамоани Суперлигада кўришдан хурсанд бўлардим.

- "Навбаҳор" футболчилари ўйин вақтини чўзишга уринишгандек бўлишди. Сабаб нимада?

- Майдон қопламаси футболчиларга жароҳат етказиши мумкин. Курашлар кўп бўлди. Футболчилар шикастланишганда танаффуслар бўлди. Биз вақтни чўзиш учун кўрсатма бермаймиз. Биз шунчаки жароҳатлардан сақланишга ҳаракат қилдик.