Рустам Мирсодиқов: "Ўзбекистон учун фақат ғалабани кутаяпман"

Бугунги ўйиндан олдин "Металлург" клуби бош мураббийи Рустам Мирсодиқовнинг фикрлари билан қизиқдик. Хабарингиз бор, Ўзбекистон терма жамоаси 1997 йил Яманга қарши иккита ўйин ўтказган ва уларнинг ҳар иккаласида ҳам бош мураббий сифатида Рустам Тўхтамуродович фаолият олиб борган.

- 18 йил олдин Яманга қарши ўйнагандик, орадан анча йиллар ўтди. Таркиблар ўзгариб кетган. Ўша пайтда термамизда Нўъмон Ҳасанов, Ойбек Усмонхўжаев, Олег Шацких, Равшан Бозоров, Александр Хвостунов каби ва яна бир қатор машҳур футболчилар ўйнашарди. Ишончим комилки вакилларимиз бу босқичдан эсон-омон ўтадилар. Ҳар доим термамизга мухлислик қиламиз. Ғалаба қозониб бизни хурсанд қилишларини истаймиз.

- Мен стадионга бормайман. Телевизор орқали ўйинни томоша қилиш мен учун қулайроқ. Чунки уйда ўйинни такрорий лавҳалари билан эфирга узатилади. Стадионда эса фақат ўйинни кўрамиз. Ўйинни телевизор орқали томоша қилиб таҳлил қилишим ҳам мумкин.

- Бу ўйинда Ўзбекистон учун фақат ғалабани кутаяпман. Фурсатдан фойдаланиб барча юртдошларимизни Мустақиллик байрами билан чин қалбимдан табриклайман, - дейди Рустам Мирсодиқов "Футбол Экспресс" газетасига берган интервьюсида.

Фирдавсхон ёзиб олди