Рустам Ашурматов: “Гадоевга 22-рақамни бермоқчи эмасман”

- “Бунёдкор” билан тоғда, Чимёнда тайёргарлик кўрдик. Менимча, ҳаммаси режа асосида ва яхши кетмоқда. Жамоавий ўйинни янада шакллантириб, янада кучайтиришимиз лозим. Мураббийларимиз шу устида иш олиб боришмоқда. Шоҳруҳ Гадоев жамоамизга келиб қўшилди. Ўйлайманки, Гадоев ҳам тезда ўйинимизга мослашиб кетади. Гадоев “Бунёдкор”ни кучайтира оладими? Менимча, ҳа. Чунки ҳар бир футболчининг ўзига яраша кучли тарафлари бўлади. Айнан шу жиҳатларини намойиш эта олса, ўйлайманки, унинг хизматлари “қалдирғочлар”га кўп наф келтиради. Гадоев “Насаф”да кўп йиллар ўйнаган, яқинда Баҳрайнда ўйнаб қайтди. Унинг тажрибаси етарли. Шоҳруҳ билан йиғин жараёнида яқиндан танишиб, анча дўстлашиб кетдик.

22-рақам? Гадоев мендан бу рақамни сўрагани йўқ, агарда сўраса ҳам ушбу рақамни ҳозира Гадоевга бермайман. (кулади)

Бошқа жамоалардан таклифлар? Йўқ, ҳозирча ҳеч қандай таклифлар бўлгани йўқ. Ўзбекистонда “Бунёдкор”дан бошқа жамоанинг таклифлари мени қизиқтирмайди. Фақатгина хориждан таклиф бўлсагина буни ўйлаб кўришим мумкин. “Бунёдкор” билан амалдаги шартномам 2018 йилга қадар мўлжалланган.

МТЖга чақирилмаётганим мени ҳавотирга соладими? Йўқ. Асосий таркиб футболчиси сифатида ўйнай бошлаганимга энди 1,5 йил бўлди. Ҳали ҳаммаси олдинда, деб ўйлайман.