Рўзиқул Бердиев: "Тарихий ғалабага эришдик"

"Биз тарихий ғалабага эришдик. Бу билан барча ишқибозларимизни табриклайман. Бугунги натижа ўйинга мос бўлди. Стадионга келган мухлисларнинг кўп қисми ҳам биз томонда бўлди ва биз биргаликда ғалабага эришдик. Жиззахликларга ушбу ажойиб муҳитни ташкил этиб беришгани учун миннатдорчилик билдираман. Стадион маъмуриятига ўз ташаккурларимизни билдирамиз. Финални нейтрал майдонда ўтказишни қўллаб-қувватлайман. Юртимизда янги стадионлар барпо этилмоқда ва бу каби катта иншоотларда ҳақиқий байрамни ташкил этиш зарур. Мухлисларга футбол байрамини тақдим этиб бериш лозим. Мен қачон ғалабага ишона бошладим? Иккинчи бўлимни ҳужумкор руҳда бошлаганимизда мен ғалабага ишонишни бошладим. Танаффусдан сўнг йигитлар янада ҳужумкорликни оширишди ва бир қатор голли вазиятларни яратишда фаоллик кўрсатдик. Биринчи бўлимда ҳам гол уриш учун яхши имкониятларни юзага келтиргандик. Масалани иккинчи таймда ҳал этдик. Ушбу йирик ғалабани мен бутун Қашқадарё мухлисларига бағишлайман", дейди мураббий.