Рўзиқул Бердиев: "Рақибга муносиб қаршилик кўрсата олмадик"

"Бугунги ўйинимиз билан ғалабага лойиқ эмасдик. Биз кутилган ва муносиб ўйнай олмадик. Рақиб яхши қаршилик кўрсатди. Барча футболчиларимизда ҳаяжон сезилиб турди. Ўйинлар ҳали бор ва кураш давом этади. Бизлар ўз имкониятимиз даражасида ўйинга тайёргарлик кўргандикк ва шунга яраша режа туздик. Бу мусобақа жуда юқори савиядаги турнир. Бу ерда юқори ижрочилар кўп нарсани ҳал этади", - дея гап бошлади Рўзиқул Бердиев.

- Артур Геворкян жамоанинг етакчиси. Лекин у бугун ўзидан кутилган футболни кўрсата олгани йўқ.

- Артур жароҳатидан эндигина фориғ бўлиб сафга қайтганди. Шуни боис у бугун ўз имкониятарини тўлиқ намойиш эта олмади. Кейин шуни ҳам таъкидлашни истардим, бугун рақиб жамоадаги захира футболчилари ўйинни сезиларли даражада кучайтириб юборишди. Бизнинг захирадаги футболчиларимиз эса ишончни оқлай олишмади. 

- "Насаф"ни кейинги босқичга чиқиш имкониятларини қандай баҳолайсиз?

- Имкониятларимиз уч соат аввалгидан анча пасайди. Лекин ҳали имкониятларимиз бор ва бу учун курашни давом эттирамиз. Бизнинг олдимизга ҳеч ким юқори мақсадларни қўймаган. Лекин биз охиригача курашамиз ва гуруҳдан чиқишга ҳаракат қиламиз.