Рўзиқул Бердиев: "Биз бугун икки очко йўқотдик"

 Матбуот анжуманининг дастлабки қисмида жамоамиз бош мураббийи Рўзиқул Саъдуллаевич иштирок этди ва ўйин ҳақидаги фикрлари билан ўртоқлашди.
 
-Икки жамоа ҳам бугун ғалабага эришиши мумкин эди. Чунки кўрдиларингиз ҳар иккала жамоада ҳам голлик вазиятлар бўлди. Аммо имкониятлардан ҳеч ким бугун фойдалана олмади. Учрашувдаги ҳар иккала жамоанинг бугунги ўйини дуранг натижага мос бўлди. Аммо биз бугун икки очко йўқотдик. Юқори мақсадлар учун кураш олиб бораётган жамоа учун ҳар бир очко жуда катта қийматга эга. Бугунги ўйинни томоша қилган мухлислар ажойиб ўйинни гувоҳи бўлишди.
 
Биз бугун ўз ўйинимизни тўлиқ намойиш эта олмадик, кейинги пайтларда қийин ўйин ўтказаяпмиз, қолаверса олдимизда янада бизни муҳим ўйинлар кутиб турибди, буни ҳам эътиборга олмасдан иложимиз йўқ.  Ўзларингизга маълум, бугун айрим ўйинчиларимиз майдонга тушмади. Биз уларга дам беришга қарор қилдик. Яъни олдиндаги ўйинларни ҳам ўйлашга мажбурмиз. Ўйлайманки, келаси ўйинларда биз янада ўйинимизни кучайтирамиз. Олдимизда кубок баҳсининг ярим финал жавоб учрашуви турибди, яъни бу йилги кубок баҳслари ҳам якунловчи босқичга етиб келди, биз финалда ўйнашни жуда ҳоҳлаймиз. Шунинг учун айрим ўйинчиларни бугун ўйинга туширмадик, қолаверса уларнинг айримларида енгил жароҳат ҳам бор эди. Уларнинг тўлиқ тикланишига имкон ҳам бердик. Энди биз бор эътиборимизни ана шу бўлажак ўйинга қаратамиз.