Рауль Канеда: "Тошкентга ғалаба учун келганмиз"

 Бош мураббийга футболчи Ҳасан Ал Раҳеб ҳамроҳлик қилди.

"Барчага хайрли кун. Ажойиб об-ҳавога эга Тошкент шаҳрига келганимдан хурсандман. “Бунёдкор”ни янги ва ёш футболчиларни тарбиялаётган келажаги порлоқ клублардан бири деб ҳисоблайман. Биринчи ўйиндаги дурангдан сўнг имкон қадар тезроқ 3 очкони қўлга киритишни ўйлаяпмиз. Умид қиламанки, бу эртага содир бўлади. Бизнинг гуруҳ энг қийини деб ўйлайман. Сўнгги турга қадар кейинги босқичга ким чиққанини билиш даргумон. Биз Ўзбекистонга 3 очко олиб кетиш учун келганмиз”, - дейди Канеда.

“Биз бу ерга ижобий натижани қўлга киритиш учун келдик. “Бунёдкор” жуда кучли жамоа, аммо мураббийимиз айтганидек ғалаба қозонишни истаймиз. Биринчи ўйиндаги дуранг биз учун мағлубиятга тенг бўлди. Бу ерга ОЧЛдаги дастлабки ғалабага эришиш учун келганмиз”, - дейди Ҳасан Ал Раҳеб.



- Сиз келганингизга бир ҳафтача вақт бўлди. Эртага сиз ишонч билан ютамиз деяпсиз. “Ал Наср”да нимани ўзгартира олдингиз?
- Жамоада ниманидир ўзгартирмадим. Шунчаки йигитларнинг имкониятини яхши биламан. Жамоани ярим йилдан буён кузатиб юргандим. Жамоада ғалабага бўлган ишонч катта. Шу билан бир қаторда “Бунёдкор”нинг ёш футболчиларига ҳам ҳурмат сақлаган ҳолда ғалаба қозонишни истаймиз.

- Ўтган ўйинда сиз Игитага маслаҳатлар бердингизми?
- Йўқ, ўша ўйинга келгандим. Аммо ҳали бош мураббий бўлмагандим. “Бунёдкор”га қарши ўйиндан сўнг мени тайинлашди. Биринчи турда жамоани тўлалигича Игита бошқарди.

- “Ал Ваҳда”га қарши ўйинда сиз бош мураббий сифатида илк ўйинни ўтказдингиз. Ўша ўйиндан қониқиш ҳосил қилдингизми?
- Ўйиндан тўлалигача қониқдим дея олмайман. Бизда учрашувга тайёргарлик кўриш учун вақтимиз етарли бўлмади. Агар ғалаба қозона олсак бизни тўхтатиб қолиш қийин бўлади.

- Мали ва польшалик футболчиларнинг ҳолати қандай?
- Мен футболчиларни маҳаллий ва легионерга ажратмайман. Баъзи футболчиларда жароҳатлар бор, аммо умид қиламанки эртага барча футболчилар майдонга туша олишади.

Нарзулла Сайдуллаев