"Марсель" жанжалкашларни расман бадарға қилмоқда. Рабьога таклифлар бор

Бугун маълум бўлишича, "Марсель" Адриен Рабьо ва Жонатан Роу ўртасидаги келишмовчиликдан сўнг, иккала футболчини ҳам трансферга қўйган. Клуб бу ҳақда расман маълум қилди. Жамоа ички муҳитига таъсир ўтказган футболчилар кечирилмади. RMC Sport хабар беришича, 30 ёшли Адриен Рабьони қисқа муддатда сотиш қийин бўлса-да, унга йирик клублар, жумладан "Ювентус" ва "Милан" қизиқиш билдирмоқда.

Рабьо 2019 йилдан 2024 йилгача "Ювентус" сафида тўп сурган ва эркин агент сифатида жамоадан кетган.

2024/25-йилги мавсумда яримҳимоячи Лига 1да 29 та ўйин ўтказиб, 9 та гол урган.

Эслатиб ўтамиз, Лига 1'нинг 1-турида "Ренн"дан учралган мағлубиятдан сўнг (0:1) "Марсель" клубининг кийим алмаштириш хонасида футболчилар ўртасида муштлашув келиб чиққанди.

Ҳаммаси Роудан бошланди, у танқиддан ғазабланиб, Рабьога шапалоқ туширмоқчи бўлди. Ходимлар уларни ажратишдан олдин футболчилар бир-бирига зарба беришга улгурди.