"Қўқон-1912" ҳам йиғинни бошлади

Жамоа аъзолари тушликдан сўнг Қўқонда  йиғилди. Айтиш лозимки, футболчилар ушбу йиғин давомида Данғара туманидаги "Бовлинг" меҳмонхонасида истиқомат қилишадиган бўлди.

Бош мураббий Рустам Абдуллаев таътилдан қайтган футболчиларга ортиқча юклама бермади ва биринчи кун машғулоти асосан югуриш билан ўтказилди. Янги йилга қадар асосан тикланиш машғулотлари ўтказилиши режалаштирилган.

Таркибдаги ўзгаришларга тўхталадиган бўлсак, жорий мавсум қўқонликларнинг ёқимтойига айланиб улгурган Дониёр Усмонов ҳозирча таркибга қайтмади. 20 ёшли ҳужумчи ҳуқуқий жиҳатдан Тошкентнинг "Локомотив" клубига тегишли бўлгани учун ҳам унинг келгуси тақдири ҳозирча сўроқ остида турибди. Таркибга янги келиб қўшилганлардан Иззат Ғаниев ва Сардор Қулматовни айтиш мумкин. Якунланган мавсумда "Нефтчи" шарафини ҳимоя қилган ушбу футболчилар кўрикдан ўтмоқда.

Селекция жараёни давом этади. Шу боис яқин кунлар давомида янги номлар пайдо бўлиши кутилмоқда.