Қаршида ёмғир тинди, жамоалар эса аллақачон стадионда ФОТОГАЛЕРЕЯ

Айни пайтда Қаршида эрта тонгда бошланган кучли ёмғир тинган. Ҳаво ҳарорати бироз совуқ. Футболчилар учун футбол ўйнайдиган ажойиб ҳаво. Дастлаб стадионга ўйинни бошқариб борадиган австралиялик ҳакамлар ҳамда учрашув комиссари ташриф буюришди.

Сал ўтиб эса меҳмонлар "Ал Васл" клуби ўзи ажратилган "Шўртан" жамоаси автобусида "Марказий" стадионга етиб келди. Охирги бўлиб эса мезбонлар "Насаф" жамоаси автобуси "Марказий" стадионга келиб тўхтади.

Шуни алоҳида қайд этиш керакки, ҳаво совуқлигига қарамасдан амирликлар футболчиларининг аксарияти жуда енгил кийиниб олган. Улар ўзларини худдики Дубайда юргандек ҳис этишган шекилли, ҳозирча Қаршидаги совуқ ўз таъсирини кўрсатгани йўқ.

"Насаф" жамоаси вакилларининг кайфияти анча юқори. Лекин шу билан биргаликда жамоа аъзолари жиддийликни ҳам йўқотишгани йўқ. Улар қанчалик масъулиятли баҳсга тайёргарлик кўришганини бир зум бўлсада унутишгани йўқ.

"Насаф"нинг асосий таркиби

Рўзиқўл Бердиев бугунги учрашувда чап қанот ҳимоясида аввал тахмин қилганимиздек Сайдулло Раҳматовни қўйган. "Ал Файсали"га қарши ўйинга нисбатан фақатгина шу ўзгариш амалга оширилган. "Персеполис" билан ўйиндаги каби жамоа бугун 3 марказий ҳимоячи билан эмас, балки ўзининг одатий услубида, яъни 4-2-3-1 тактик схемасида ўйнайди.

Гарчи ҳаво ҳарорати бироз совуқ бўлишига қарамасдан "Насаф"нинг ашаддий ишқибозлари ҳозирданоқ стадионга келиб ўз ўрниларини банд этиб туришибди. Ёмғир тинганини инобатга олсак, ўйин бошлангунига қадар трибуналар ўз эгаларини топишига шубҳа йўқ. Зеро бугун "Насаф" ўз мухлислари олқишига ва қўллаб-қувватлашига муҳтож.

Яқин дақиқалар ичида кўпчилик интиқлик билан кутган учрашув старт олади. Биз эса ўз навбатида "Насаф" жамоасига омад тилаб қоламиз!
Демак қаршиликлар "Марказий" стадионга отланишлари керак бўлса, қолган ўзбекистонлик миллионлар ўйини иҳлосмандлари соат 17:55да бошлаб телевизор қаршисига яхшилаб михланиб олишса мақсадга мувофиқ бўларди.

Ҳа-я, айтганча, Сиз азиз ўқувчилар эса севимли сайтингиздан бир зумда бўлсада чиқиб кетишни ҳаёлингизга келтирманг:-)