“Поханг Стилерс” – Жанубий Корея чемпиони!

Сафарда “Ульсан Хюндай” меҳмони бўлган “Поханг Стилерс” 1:0 ҳисобида ғалаба қозониб, 74 очко жамғарган ҳолда чемпионликни қўлга киритди.

Бу ўйинда “Ульсан”га ҳам ғалаба керак эди, бироқ улар ўз майдонларида ютқазиб қўйишди. Учрашувдаги ягона гол 89-дақиқада Ким Вон Ил томонидан киритилди. Ушбу ғалабадан сўнг “Поханг” олтин дублни қайд этди, чунки улар ўтган ойда “Чонбук Моторс”ни Кубок финалида мағлуб этишганди.

Шундай қилиб 2009 йилги ОФК чемпионлар лигасида зафар қучган жамоа яна мамлакат чемпиони бўлди. Иккинчи ўрин 73 очко тўплаган “Ульсан”га, учинчи ўрин 63 очко жамғарган “Чонбук Моторс”га насиб этди. Бу йил ОЧЛ финалида тўп сурган “Сеул” эса 62 очко билан тўртинчи ўринни эгаллади.