“Пахтакор”га гол уриб “Динамо”га тарихий ғалабани келтирган молдовалик Раду Рогак ҳақида

Камтарин таркибга эга самарқандиклар ўша йили дастлабки учта турда мағлубият нималигини билишмаганди. Тошкентда “Пахтакор” сенсацион тарзда мағлуб этилган, “Бунёдкор” билан меҳмондан бир очко билан қайтганди. Ҳаттоки, мухлислар орасида ўзбекнинг “Лестери” деб эътроф этилганди. “Шерлар” билан кечган муросасиз баҳсда Рогак оҳирги дақиқада гол уриб тарихий ғалабани олиб берганди. Хўш, аслида футболчининг юртимизга келиб қолиши қандай бўлганди? Жамоадан кетганидан сўнг қандай хулосалар чиқарди? Мазкур саволларга ҳимоячи билан ташкил қилинган қуйидаги интервью орқали жавоб олишимиз мумкин.

“1995 йил Молдованинг Бельци шаҳрида туғилганман. Футболга кирим келишим маҳаллий “Заря” жамоасидан бошланган. Айнан бу клуб академиясида илк сабоқларни олганман. Шунингдек, жамоа билан Молдова чемпионатида учинчи ўринни эгаллагандик. Бунинг натижасида мен Молдова ёшлар ва олимпия терма жамоасига чақирилдим. Айтганча, “Заря”да мен билан бирга Александр Оника тўп тепганди. У “Локомотив” ва “Нефтчи”даги ўйинлари билан мухлисларга танилган. Вадим Чемиртанга қарши бир неча маротаба ўйнаганман. У кучли ва махоратли футболчи деб ўйлайман. Мен билан бир жамоада ҳаракат қилган Муҳаммад Коне бир мавсум “Локомотив”да ўйнади. Андрей Кожокарь ҳам маълум муддат “темирйўлчилар” таркибида ҳаракат қилганди.

“Динамо”га келишим тарихи ўзгача бўлган. Эшитишимга қараганда ўшанда клуб менежери Илҳом Шарипов Азамат Абдураимовга мурожаат қилган. Азамат Биродарович билан алоқаларим яхши эканлиги боис менга Ўзбекистондан таклиф борлигини айтди. Ўзимизнинг чемпионатдан савияси бир мунча юқори эканлиги боис ўзимни синаб кўриш истаги туғилди. Ўртада агентлар ҳам муҳим рол ўйнади. Улар менга: “Сени Ўзбекистонда кутишмоқда. Мураббийларга ёқсанг шартнома имзолашади”, -деди. Икки ҳафталик кўрикдан сўнг келишувга эришдик.

Таассуротларим бир олам. Менга Тошкент ва Самарқанда жуда ёқди. Очиғи, юртингизда футболга бу қадар жиддий эътибор беришларини кутмагандим. “Динамо”нинг уй учрашувларида мухлислар стадионга сиғмасди. Чипталар тугаб, кўплаб одамлар ташқарида қолиб кетган пайтларни гувоҳи бўлдим. Бу мени ҳайрон қолдирди.

Сафарда “Пахтакор”га муҳим гол урганим ёдимда. Ажойиб кеча бўлганди ўзиям. Бир йил давомида битта тўп киритдим. Жамоа анча йилдан бери рақиб майдонидан очкосиз қайтаётганди. Муҳими, ўша гол мураббийларга ва ишқибозларга унутилмас онларни тақдим қилди. Ушбу жамоада узоқ вақт ўйнашни истагандим. Турнир жадвалидаги ўрнимиз қуйи лигага тушиб кетишимизга сабаб бўлди дея олмайман. Чунки, олдинги ЎФА раҳбарларининг қарорига кўра элитадан тушириб юборилдик. Мен эса юқори лигаларда ўйнагим келди.

Футбол ҳозирги кунда барча мамлакатларда ривожланиб бормоқда. Молдовада ҳам сўнги йилларда эътибор анча ошди. Чемпионатмизнинг савияси ёмон эмас. Аввал бундан ҳам яхшироқ эди. Умид қиламанки, яна олдинги даражага қайтишимизга ишонаман. Европада рақобат кучли. Терма жамоамиз иложи борича кучли терма жамоалар билан мусобақаларда рақобатлашишга ҳаракат қилмоқда.

Самарқандда ўтказган вақтимга афсусланмайман. Ўзим учун янгилик кашф қила олдим. Аслида мақсадим ҳам шундай эди”,- деди Рогак.

Абдулазиз Искандаров тайёрлади.