Ўзбекистон U-20 термаси дарвозабони пенальтига олиб келиши мумкин бўлган баҳсли вазият, Индонезия ва Эронга қарши бўлажак учрашувлар ҳақида гапирди

– Муҳаммадюсуф, аввало, турнирни ғалаба билан бошлаганингиз билан сиз ва бошқа йигитларни муборакбод этаман. Кечаги ўйинда жамоа ҳаммасини яхши бошлади, аммо ғалабани ушлаб қолиш илинжида 2-таймда бироз қийинчиликка дуч келди. Кўпчилик, шу жумладан, мухлислар учрашувнинг иккинчи қисмини катта хавотир билан кузатди. Терма жамоамизнинг биринчи ва иккинчи таймдаги ўйини тубдан фарқ қилишига нима сабаб бўлди?

– Мусобақанинг илк ўйинлари ҳар доим қийин бўлади ва босим беради. Биз буни тушиниб тургандик. Рақиб ҳам ўзига яраша кучли, яхши ўйин намойиш этди. Ўйлайманки, ўйиндан ўйинга ўз ўйинимизни яхшилаб бора оламиз. Кейинги учрашувларда янада ишончли ўйин кўрсатиб, ижобий натижаларни қайд этишга ҳаракат қиламиз.

- Пенальтига олиб келиши мумкин бўлган баҳсли вазият кўплаб муҳокамаларга сабаб бўлмоқда. Кимдир пенальти бор деса, кимдир йўқ деяпти. Учрашувда бевосита иштирок этган дарвозабон сифатида ушбу вазият бўйича нима дея оласиз? 

– Ҳакам қарорини муҳокама қила олмайман. Бу вазиятда нимадир дейиш қийин. Ҳакам вазияга жуда ҳам яқин эди ва кузатиб турганди.

– Ўзбекистоннинг кейинги турдаги рақиби Индонезия Эронга йирик ҳисобда ютқазганига қарамай, Ямандан кучлироқ кўринди... Уларнинг ўйини ўрганиб чиқиляптими? Мураббийлар ва шахсан ўзингиз Индонезия бўйича қандай фикрдасиз? 

– Кейинги турда Индонезияга қарши майдонга тушамиз. Осон ўйин бўлмади, ўзи умуман, буёғига осон ўйин йўқ. Менимча, қолган ҳамма ўйинларни финалга тенглаштирсак бўлади. Уларга ҳам тайёргарликни давом эттиряпмиз.

– Қайси ёш тоифаси бўлишидан қатъи назар Ўзбекистон ва Эрон ўртасидаги қарама-қаршилик ҳар қачонгидан жиддий тус олган. 3-турда Ўзбекистондан жанг кутамизми?

– Эрон билан ўйинда ҳам фақат ғалаба учун майдонга тушамиз. Ниятимиз – гуруҳдан биринчи ўрин билан чиқиш ва Жаҳон чемпионати йўлланмасини қўлга киритиш. Рақиб ким бўлишининг фарқи йўқ, бор имкониятимизни ишга солиб, асосий мақсадимиз йўлида ҳаракатда давом этамиз.

Шерзод Нурматов суҳбатлашди