Ўзбекистон Coca-Cola кубоги: 1/8 финал босқичига йўл оладиган жамоалар хусусида

6 гуруҳ якунларига кўра, ҳар бир гуруҳда дастлабки икки ўринни қўлга киритадиган клублар 1/8 финал иштирокчисига айланади. Шунингдек, гуруҳларда энг яхши учинчи натижа кўрсатган 2 та клуб ҳам 1/8 финалда иштирок этади. Биласиз, Осиё Чемпионлар лигасининг гуруҳ босқичида иштирок этувчи клубларимиз – “Пахтакор” ва “Насаф” ҳам мамлакат кубогидаги иштирокини айнан мана шу босқичдан бошлайди.

1/8 финалдан бошлаб то финалга қадар бўлган плей-офф жуфтликларига алоҳида қуръа ёрдамида аниқлик киритиб олинади.

Гуруҳ ғолиблиги учун курашни таъминлаш мақсадида 1/8 финал босқичига қуръа ташлаш маросимида гуруҳ ғолиблари алоҳида саватда бўлади ва улар ушбу босқичда бир-бири билан, шунингдек, Осиё Чемпионлар лигасининг гуруҳ босқичида иштирок этувчи клублар билан тўқнаш келмайди. Бир ўйиндан иборат учрашувларга ким мезбонлик қилиши қуръа ёрдамида аниқлаб олинади.