Осиё ўйинлари қолдирилди. Демак, бу йил Лига кубогидан воз кечиш керак

Тақвим лойиҳасига кўра, Лига кубогининг биринчи босқичи 23-30 июль кунлари, иккинчи босқичи эса 2-17 сентябрь кунлари бўлиб ўтиши керак эди.

Аммо 6 май куни Осиё Олимпия кенгаши ижроия қўмитасининг Тошкентдаги йиғилишида сентябрь ойида Хитойнинг Ханчжоу шаҳрида ўтиши керак бўлган Осиё ўйинлари кейинги йилга қолдирилгани эълон қилинди.

"Сентябрь ойида Хитойда бўлиб ўтадиган Осиё ўйинлари қолдирилди. Умуман олганда бизнинг бунга ишончимиз комил эди. Энди тақвим масаласида яна бироз бош қотириш керак бўлади", - деб ёзади Диёр Имомхўжаев телеграмдаги ўз каналида.

Агар Лига кубоги мусобақасидан воз кечиладиган бўлса, бу муддатга Суперлиганинг камида учта турини сиғдирса бўлади. Шундай бўлган тақдирда Суперлигамиз ноябрь ойи охирида эмас ярмида тугайди.

Лига кубоги мусобақасидан фақат бу йил воз кечиш керак деб ҳисоблайман, кейинги йилларда эса пухта режа билан, қўшни давлат клубларининг режаларини олдиндан билган ҳолда, аниқ тақвим билан ўтказилиши тарафдориман. Фақат мусобақа ҳақида йил бошида эълон бериш керак. Шунда клубларимиз бошланаётган йил учун сметада Лига кубоги харажатларини ҳам киритиб қўйишади.