"Ўша пайт музлаткичимда ҳеч нима қолмаганди"
21 фев 2024 12:50
Янгиликлар

"Ўша пайт музлаткичимда ҳеч нима қолмаганди"

Бир пайтлар "Арсенал" сафида ўзига хос ўйинлари билан мухлислар диққатини тортган ва кейинчалик "Барселона" ўтиб аста-секин пастга шўнғиган ярим ҳимоячи Алекс Сонг билан боғлиқ кичик тарихни ёдга оламиз.

"17 ёшимда "Арсенал"га келганимда биринчи профессионал шартномамни имзолаганман ва 15 минг евро олганман. Ўшанда мен эйфорияда эдим.

Сиз 4000 евродан 15000 га кўтарилган ёш ўйинчини тасаввур қилишингиз мумкин. Ўша палладаги эйфория сабаб мен "Арсенал"нинг буюк ўйинчилари каби йўл тутишни хоҳладим.

Бир куни машғулотга келдим ва Тьери Анри қандай бриллиант машинада келганини кўрдим. Жин урсин, ахир бу "Lincoln Navigator" (ҳозирги нархи тахминан 100 минг доллар атрофида). Мен ҳеч нарсага қарамай худди ўша машинадан олишим керак деб ўйладим.

Футболчи бўлсангиз автомобил харид қилаётганда бази ҳужжатларга қўл қўйишни ўзи кифоя. Улар сенга машинани беришади ва пулларни маошимдан олиб қолаверишади.

Лекин, орадан 2 ой ўтиб мен автомобилни қайтариб берганман. Чунки, бу бензин сарфи жуда юқори бўлган Америка машинаси эди. Музлаткичимда ҳеч нима қолмаганди. Сабаби, ҳамма пулларим ёқилғига кетарди. Мен уларга қимматбаҳо автомобилни қайтариб берганман ва ўрнига "Toyota" беришларини сўраганман.

Машина алмаштирганимдан кейин машғулотга келганимда Тьери мендан сўради: "Сон, машинанг қани?". Мен эса унга шундай жавоб қайтардим: "Бу менинг даражамдаги машина эмас".