Оллоберган Каримов "Бунёдкор"даги дебюти ҳақида: "Иккинчи голга пас берганимдан сўнг ҳаяжон йўқолди"

2006 йилда туғилган  Оллоберган Каримов кеча асосий жамоадаги илк учрашувини ўтказди. 63-дақиқада Дмитрие Побуличнинг ўрнига майдонга тушган футболчи 70-дақиқада Фарруҳ Икромовнинг голига ассистентлик қилди. Шунингдек, яна бир вазиятда дарвозага йўллаган зарбаси тўсинга тегиб қайтди. Учрашувдан сўнг унинг фикрлари билан қизиқдик. Маълумот учун, футболчи Ўзбекистон U-17 терма жамоаси аъзоси ҳисобланади. 

"Истайманми ёки йўқ барибир ҳаяжон бўлди. Лекин Фарруҳ Икромовнинг голига пас берганимдан сўнг ўзимда ишонч анча ортди. Босим ва ҳаяжон йўқолди. Ҳаммаси жойига тушди. Ишонч билдирган барча мураббийларимга раҳмат айтиб қоламан. Уларсиз бу даражага чиқмаган бўлардим. Захирадан майдонга тушаётганимда Бошкович Побулични ва шу позициядаги "Сурхон" футболчиларини кузатишимни айтди. Майдонга тушдим ва менга берилган имкониятдан фойдаланишга ҳаракат қилдим. 

Ўйин назоратимиз остида ўтди, дея оламан. "Сурхон" ҳам етарлича қаршилик қилди. Вазиятларимиздан фойдаланиб иккита гол урдик",- дейди Оллоберган Каримов. 

Абдулазиз Искандаров ёзиб олди