Олий лига-2015. Тўхтахўжаев ва Голбан дарвозабон ролида

Илк қизил карточкани 11-турда "Локомотив" дарвозабони Маъмур Икромов "Бухоро"га қарши ўйинда олди. 85-дақиқада Икромов ўз жарима майдони ташқарисида тўпни қўли билан ўйнагани учун Вадим Агишев томонидан қизил карточка билан "сийланганди". Ўша пайтга келиб "Локо" мураббийлари учта ўзгаришни амалга ошириб бўлишганди. Шу боис қолган вақтда дарвозани ҳимоячи Ислом Тўхтахўжаев қўриқлаганди. Тўхтахўжев 5 дақиқадан ортиқ вақт давомида ўз дарвозаси даҳлсизлигини сақлаб қолди. 

Иккинчи давра олдидан "Олмалиқ" клуби ўз сафига легионер дарвозабонни қўшиб олди. Валерий Фомичев 16-турда "Пахтакор" билан ўйинда ўз дебютини нишонлади. Айтиш мумкинки дебют жуда омадсиз чиқди. Учрашувнинг 19-дақиқасида Владимир Козакнинг зарбасини қайтара олмаган посбон 26-дақиқада ўз жарима майдони ичида Станислав Андреевни йиқитди. Эътиборлиси бу учрашувда ҳам Вадим Агишев бош ҳакам бўлганди. Рефери унга қизил карточка кўрсатди ва пенальти белгилади. Ўйин боши бўлгани учун Игорь Шквирин ҳисобида ўзгариш мавжуд эди. Унинг ўрнига майдонга тушган Умид Хонимқулов пенальтини қайтара олмади. Ўйин "Олмалиқ"нинг 1:2 ҳисобидаги мағлубияти билан тугаганди.

30-турда "Бунёдкор" ва "Қўқон-1912" ўртасидаги ўйинда меҳмонлар посбони Руслан Матниёзов майдондан четлатилди. 85-дақиқада ўз жарима майдонини тарк этиб Достонбек Ҳамдамовни йиқитгани учун Дмитрий Пислегин Матниёзовга қизил карточка кўрсатди. Ўзгаришлар қолмагани боис дарвозани "Қўқон-1912" ҳимоячиси Игорь Голбан эгаллади. Қизиғи бу вақтга келиб "Бунёдкор" 5:0 ҳисобида олдинда бораётганди, Голбан дарвозага тургач "қалдирғочлар" гол ура олишмади.

Нарзулла Сайдуллаев