Ўйиндан ташқари ҳолатда қолиб кетганлар ёхуд улар бутсаларни михга илдими?

Хаттоки ўз даврида терма жамоада ўйнаганлар ҳам бугунги кунда ҳеч бир клуб сафида кўриниш бераётгани йўқ. Албатта бу – бутун дунё футболида учраб турадиган холдир. Қуйида эса бу йил катта футболда кўринмай қолган футболчилар ҳақида сўз юритамиз.

Игорь Михайлов
Ўтган мавсум Самарқанднинг “Динамо” жамоаси рўйхатидан ўтган тажрибали посбонни бу йил ҳеч бир клуб таркибида кўрмаяпмиз. Тачмурод Агамуродов 35 ёшли посбоннинг хизматидан воз кечгач, Михайловни қишки тайёргарлик жараёнида ҳам бирорта клуб йиғинида учратмадик. Игорнинг охирги йиллардаги кўрсаткичларига эътибор қаратадиган бўлсак, унинг кўп ҳам ўйин амалиётга эга бўлмаганини кўриш мумкин. Балки у қўлқопларини михга илиб, ўзини мураббийликда синаб кўрар.

Илҳом Суюнов
“Пахтакор” сафида ўйнаб мухлислар қалбидан жой олган Суюновнинг бугунги кунда жамоасиз эканлиги ажабланарлидир. Ёшлар ўртасида ЖЧ-2003 иштирокчиси ва Ўзбекистон миллий терма жамоаси таркибида қатор учрашувларда майдонга тушган Илҳомнинг охирги жамоаси Тошкентнинг “Локомотив” клуби бўлади. Ўтган мавсумнинг иккинчи ярмидан “темирйўлчилар” аъзосига айланган ҳимоячи чемпионат якунига етгач жамоа билан хайрлашганди. Суюновни кейин қишда маълум муддат “Қўқон-1912” йиғинида бўлганини биламиз.



Шавкат Насибуллаев
Насибуллаев гарчи ўтган йили биринчи лигада ўйнаган бўлсада, уни олий лигадаги маҳоратли футболчилар қаторига қўшиш мумкин. Чунки у “Сўғдиёна”, “Қизилқум”, “Нефтчи” ва “Навбаҳор” жамоаларида ўйнаб буни амалда исботлай олган. Қайси жамоада бўлмасин кўпинча сардорлик вазифасини бажарган Шавкат ўтган йили “Шўртан”нинг олий лигага қайтишида ҳам салмоқли ҳисса қўшди. Аммо бош мураббий бу йил унинг хизматидан фойдаланмасликка қарор қилди. Шундан кейин Насибуллаевни яшил майдонда учратмадик.

Азиз Алижонов
“Нефтчи” таркибида ёрқин ўйинлари билан ишқибозлар назарига тушган Алижоновни ҳам бугунги кунда ҳеч бир клуб сафида кўрмаяпмиз. 31 ёшли футболчи аслида ўтган йили ёзда “Нефтчи” билан хайрлашганидан сўнг ўзига янги жамоа топа олмаганди. Бу йил Азиз қишда “Андижон” йиғинида бўлганди. Аммо кейинчалик у яна орга қайтди ва шундан бери бошқа клубга ўтмади.

Акмал Бозоров
Самарқандлик футболчининг ишлари чакки эмасди. Бунгача асосан “Динамо” шарафини ҳимоя қилган Бозоров ўтган йили 16та ўйинда майдонга тушганди. Йил бошида “Олмалиқ”дан таклиф олиб, жамоа ўқув-йиғин машғулотларида иштирок этган Акмал сўнгги паллаларда ўзига бошқа жамоа топиши кераклиги ҳақида эшитади ва Игорь Шквирин жамоаси лагерини тарк этади. Шундан кейин чапақай футболчи ҳеч бир жамоа таркибига бориб қўшилмади.

Тоҳир Шасмиддинов
Шамсиддиновнинг бу йил катта футболдан четда қолиб кетиши юқоридагиларникидан фарқ қилади. Тоҳир аслида бу йил “Навбаҳор”га ёрдам бериши мумкин эди. Аммо унинг олимпия терма жамоаси сафидаги салбий харакатлари бир йилни расмий ўйинларсиз ўтказишига сабаб бўлди. Гарчи у бу йил расмий баҳсларда иштирок эта олмасада, “Навбаҳор” машғулотларида қатнашиб, ойлик маошларини олаётгани ҳақида маълумотлар бор. Айтиш лозимки, 22 ёшли футболчи ўтган йили “лочинлар” таркибида 19та ўйинда иштирок этганди.



Шавкат Раимқулов 13та ўйин
Шавкат Раимқулов ҳам ёшлар ўртасида ЖЧ-2003 иштирокчиси саналади. “Трактор”, “Навбаҳор”, “Андижон”, “Бундёкор”, “Насаф”, “Бухоро” каби жамоаларла ўйнаган ҳимоячининг фаолиятида сезиларли равишда пасайиш бўлганини кўриш мумкин. Ўтган мавсумни биринчи лига иштирокчиси “Оқ-тепа”да бошлаб, кейинчалик элита қатнашчиси “Бухоро” таркибидан ўрин олган Раимқулов бу йил мавсумлар оралиғида “Андижон” йиғинида қатнашди ва маълум муддат ўтиб, у жамоадан кетганди. Шавкатни кейин биринчи лига клубларида ҳам кўрмадик.

Азиз Ғуломхўжаев 11та ўйин
Азиз Ғуломхўжаевда ҳам барқарорлик кўрмаяпмиз. Чап қанот ҳимоячиси “Андижон”даги фаолияти орқали олий лигада ҳам бемалол ўйнай олиши мумкинлигини исботлаганди. 25 ёшли футболчи ўтган йили “Бухоро”да кўним топганди. Аммо давралар оралиғида клуб у билан хайрлашди. Шундан сўнг Азиз ўйин амалиётини йўқотмаслик мақсадида биринчи лига аъзоси Тошкентнинг “Обод” клубида ўйнаб турди. Қишда яна “Андижон”га келиб йиғинда иштирок этган ҳимоячи кўрикдан ўта олмади шекилли қисқа фурсат ичида жамоа лагерини тарк этди. Шундан сўнг Ғуломхўжаев ҳеч бир клуб сафида кўриниш бермади.

Андрей Акопянц
Тажрибали футболчи афтидан яна Россияга кўчиб кетган кўринади. Ўтган йили биринчи даврада “Бухоро” шарафини ҳимоя қилиб, иккинчи даврада “Нефтчи” таркибидан ўрин олган Акопянц аввалгидек тезкорликни намойиш эта олмади. Ёш ўтган сайин, инсон жисмоний томондан ҳам заифлашиб боришини ушбу футболчи мисолида ҳам кўриш мумкин. Ўз вақтида миллий терма жамоамиз таркибида чап қанот ярим ҳимоясини “ўзиники” қилиб олган Андрей бутсаларини михга илса ҳам бўлади. 38 ёшли футболчи эхтимол бугунги кунда Россия 2-лигасидаги жамоаларда ўйнаётган бўлиши ҳам мумкин.



Шуҳрат Юлдашев
Бу футболчини Рустам Мирсодиқовнинг ишонган шогирдларидан бири бўлган дейиш мумкин. Боиси Шуҳрат Юлдашев узоқ йиллар давомида Мирсодиқов қўли остида ўйнади. Узоқ йиллар давомида “Металлург” учун ўйнаган футболчи негадир бекободликлар сафини тарк этди. Шундан сўнг уни бошқа клуб таркибида кўришни таҳмин қилгандик. Аммо Юлдашев ҳам хаттоки биринчи лига жамоасида кўриниш бермади.
 
Сирожиддин Сайфиев
Самарқанлик футболчилар орасида ўзига яраша ном қозонган Сайфиев ўтган йили жиддий жарохат олиб, узоқ муддатга сафдан чиқди. “Локомотив”га қарши баҳс Сирожиддин учун аянчли кун бўлди. Хатто унинг оёғи синганидан сўнг футбол билан хайрлашиши ҳам мумкинлиги айтилди. Бундай вазиятда 33 ёшли футболчининг миллионлар ўйинига қайтишдан ҳам кўра тезроқ соғайиб оёққа туриб кетишни ўйлагани мақсадга мувофиқ бўлади.
 
Ғайрат Ҳасанов
Фарғоналик ишқибозларнинг суюклисига айланиб улгурган Ҳасанов ўтган йили ёздан буён ўйиндан ташқари холатда. “Нефтчи” билан хайрлашганидан сўнг унинг ўзимизда бирор клубга ўтишига кеч бўлганди. Аммо бу йил мавсумлар оралиғида ҳам 32 ёшли посбонни бирор клубда учратмадик. Балки Ҳасанов айни дамда якка тартибда шуғулланиб, яна катта футболга қайтиш ўйлаётгандир.
 


Александр Клецков
Александр Клецковни ҳам мухлислар кўпроқ унинг “Пахтакор”даги фаолияти орқали яхши билади. 30 ёшли футболчи ўтган йили “Нефтчи” таркибида бир давра ўйнаб, кейинчалик жамоасиз қолиб кетди. Сашада ортиқча вазнни кўриб, унга ярашмаганини сездик. Аммо спортчи режимга амал қилмас экан, холат салбийлашб бораверади. Клецков ўз вақтида ОТЖ сафида хатто сардорлик вазифасини ҳам бажарган ва кейинчалик миллий терма жамоада ҳам ўйнаганди.

Темур Султонов
Наманганлик футболчини ҳам ЖЧ-2003 иштирокчиси бўлганини айтиш лозим. Султонов ўтган мавсумни “Андижон”да бошлаб кейинчалик давралар оралиғида жамоани тарк этганди. Мавсумнинг иккинчи қисмини эса у биринчи лига иштирокчиси “Хотира-79” таркибида ўтказди. Лекин бу йил Темурни уйчиликлар сафида ҳам кўрмаяпмиз.

Шуҳрат Мирхолдиршаев
Ўз вақтида олий лигада ҳар қандай ҳимоячига жиддий ташвиш туғдирган Шуҳрат Мирхолдиршаев ҳам бу йил ҳеч бир клубда кўринмаяпти. Миллий чемпионатимизнинг икки карра тўпурари (2003-2004 йилар) бўлган тажрибали ҳужумчи жарохат сабаб узоқ вақт давомида майдон четда бўлди. “Навбаҳор”, “Машъал”, “Насаф” ҳамда “Андижон” жамоалари сафида ўйнаб доимо ишқибозлар олқишига сазовар бўлган Мирхолдиршаев ўтган йили андижонликлар сафида бўлди. Иккинчи давранинг аксарият ўйинларида майдонга тушиб, имкон қадар жамоасига ёрдам беришга уринган футболчи негадир “бургутлар”нинг қишки йиғинларига бормади ва шу тариқа у клуб билан хайрлашди. Шундан сўнг 33 ёшли футболчи биринчи лига клубида ўйнашни ўзига эп кўрмади шекилли Наманган клубларида ҳам кўринмади.
 


Аюбхон Гаппаров
Айни ўйнайдиган ёшда бўла туриб ҳеч бир клубда кўним топа олмаган Аюбхон Гаппаровнинг ҳам фаолиятида сезиларли пасайиш юза келганини инкор этиб бўлмайди. Кўп йиллар давомида Қозоннинг “Рубин” ёшлар жамоасида бўлган футболчи ўтган йили биринчи лигада “Чуст-Пахтакор” шарафини ҳимоя қилаётганди. Аммо ёзда у элита қатнашчиси “Андижон” таркибидан ўрин олди. “Бургутлар” сафида 9та учрашув ўтказган Гаппаров давралар оралиғида жамоа йиғинида кўриниш бермади.


Исломбек Рустамбеков.