ОФК "Ал Насср" эътирозини инобатга олмади

Гап шундаки, "Персеполис"да аввалги мураббий Бранко Иванковичдан қарздорлик бўлишига қарамай, клуб янги футболчилар билан шартнома имзолаган. Бироқ ФИФА клубга нисбатан токи қарздорлик бартараф этилмагунча трансфер билан шуғулланишни тақиқлаб қўйганди. 

ФИФА "Персеполис"га нисбатан 6 август куни қарор чиқариб, 12 август куни бу ҳақда расман клубни хабардор қилган. Қарорда агар 12 сентябргача қарз узилмаса янги ўйинчилар билан шартнома имзолаш мумкин эмаслиги айтилган. Теҳрон клуби эса унгача, аниқроғи 8 сентябрга қадар футболчилар билан шартнома тузиб бўлган, яъни 12 сентябрдан сўнг ўз сафига ҳеч кимни қўшиб олгани йўқ. 

Шунга қарамай, Саудия Арабистони клуби "Ал Насср" ОЧЛ ярим финалида мағлубиятга учраганидан сўнг ОФКга шикоят хати йўллади. ОФК шикоятни жавобсиз қолдирди ва бу ҳақда кейинчалик ҳам ҳеч қандай расмий муносабат билдирилмасликни маълум қилди. Демак, ўйин натижаси бекор қилинмайди ва "Персеполис" ОЧЛ финалида ўйнайди.